國際權威即食麵達人 Hans Lienesch 主理的網站「The Ramen Rater」，早前就公佈了2025 年度『全球十大即食麵』排行榜！Hans 今年從全球超過 5,160 款即食麵中，嚴選出 10 款終極推介。今年亞洲品牌繼續霸榜，台灣代表起雙飛，港人最愛的營多撈麵竟然只屈居第 9 位？而冠軍寶座則由一款被譽為「藝術品」的新加坡神級拉麵奪得！最開心是這款冠軍麵在香港超市都能輕易買到！即刻睇下你食過幾多款啦！
The Ramen Rater公布2025年全球即食麵排行榜
國際知名即食麵評論家Hans Lienesch每年都會品嚐數千款來自世界各地的即食麵，而今年的榜單更是他從超過5160款即食麵中精心挑選的終極推介，權威性十足！一齊由第10位開始倒數揭曉！
十大即食麵詳細排名第十名：不倒翁（Ottogi）
將拉麵同辣炒年糕合二為一！不倒翁這款「拉麵年糕」麵質煙韌，醬汁完美還原韓國街頭小食風味，甜中帶辣，層次感十足，每一口都係暖笠笠嘅幸福感！
十大即食麵詳細排名第九名：營多（Indomie）Mi Goreng 卷麵特別版
營多撈麵絕對是經典中的經典！今次上榜為卷麵特別版，獨特嘅捲曲麵條掛汁力更強，配上熟悉嘅甜醬油同香料，加上脫水蔬菜豐富口感，評審表示對味道念念不忘！
十大即食麵詳細排名第八名：札幌一番（Sapporo Ichiban）鹿兒島黑豚味噌拉麵
札幌一番「豪華版」拉麵，湯底平衡，濃郁黑豚精華配上味噌，不會過鹹而味道非常鮮美！
十大即食麵詳細排名第七名：Mamee Chef 傳奇仁當風味乾撈麵
Mamee Chef麵條口感Q彈。仁當（Rendang）乾撈麵特別加入咗羅勒葉香氣，令整體味道更添一份異國情調，香料味超豐富！
十大即食麵詳細排名第六名：老媽拌麵（Mom's Dry Noodle）鵝油炸醬麵
台灣拌麵界代表「老媽拌麵」再次上榜！麵條寬厚煙韌，搭配鵝油炸醬，口感鹹香美味，評審形容味道似肉包內餡一樣誘人！
十大即食麵詳細排名第五名：MyKuali 檳城白咖喱麵
MyKuali白咖喱麵自2013年面世以來幾乎年年上榜，實力毋庸置疑！湯底更被譽為「改變遊戲規則」的發明！
十大即食麵詳細排名第四名：日清（Nissin）x Irvins鹹蛋味
新加坡日清與零食品牌Irvins聯手推出即食麵，將Irvins鹹蛋魚皮風味融入即食麵，鹹蛋黃醬汁濃郁帶點微辣，加上扁身麵條可以沾滿每一滴醬汁，惹味到停唔到口！
十大即食麵詳細排名第三名：老媽拌麵（Mom's Dry Noodle）酸菜乾拌麵
台灣品牌「老媽拌麵」今年有兩款產品上榜，第三名的拌麵採用獨特三叉麵條，配上開胃嘅酸菜醬同香醇芝麻醬，令人一試難忘！
十大即食麵詳細排名第二名：一風堂（Ippudo）辛辣豚骨拉麵
日本一風堂即食麵都有拉麵店級數？幼身直麵搭配濃郁豚骨湯底，再次成為評審心頭好，登上第二位！
十大即食麵詳細排名第一名：百勝廚（Prima Taste）新加坡全穀拉麵叻沙
今屆冠軍由新加坡代表「百勝廚」嘅叻沙拉麵，相隔多年後重奪第一寶座！評審形容湯底係「一件藝術品」，而這一款神級拉麵於香港部分超市同網店都有得賣，麵迷絕對要去朝聖！
U Travel 原文：去旅遊必買！2025全球10大即食麵排名出爐亞洲品牌悉數囊括！冠軍香港都有得買
