每日帶住水樽返工返學、做運動，以為好衛生？美國一項研究發現，如果水樽連續7日不清洗，含菌量竟然比廁所板仲要高，甚至比舔狗玩具更加污糟！研究由運動網站Treadmill Review委託實驗室進行，測試12款市面上常見嘅可重複使用水樽，按壺口設計分為4大類，結果令人震驚。
4款水樽含菌量大比拼 滑蓋式最驚人
研究人員將水樽分為滑蓋式、按掣式、扭蓋式同飲管式四種，量度水樽與口部接觸位置嘅含菌量，以每平方厘米菌落形成單位（CFU）計算。結果顯示，滑蓋式水樽雖然最方便使用，一滑就開唔怕漏水，但含菌量竟然高達每平方厘米93萬CFU，係4款之中最高嘅「細菌王」。研究指出，呢類水樽嘅細菌當中約有一半可能對身體有不良影響，有機會引起皮膚感染、肺炎甚至血液中毒，絕對唔可以忽視。
| 樽蓋類型 | 平均含菌量 (CFU/每平方厘米) | 細菌情況與對比 |
| 滑蓋式 (Slide-top) | 933,340 | 最髒。 飲用時嘴唇接觸的地方沾滿細菌，含菌量高得驚人。 |
| 按壓出水式 (Squeeze-top) | 161,971 | 超過九成是革蘭氏陰性菌（如大腸桿菌、沙門氏菌），對人體有害。 |
| 擰蓋式 (Screw-top / Screw-cap) | 159,060 | 同樣含有高比例的革蘭氏陰性菌，乾淨程度相當於寵物的食物碗。 |
| 飲管式 (Straw-top) | 25 | 最乾淨。 因為水分會順著飲管滑回樽底，不易積水滋生細菌，且多為無害細菌。 |
按掣式及扭蓋式 比寵物食物碗更污糟
按掣式同扭蓋式水樽嘅含菌量分別約為每平方厘米16.2萬CFU同15.9萬CFU，雖然比滑蓋式低一大截，但仍然遠遠超出大家嘅想像。研究形容，使用呢類水樽比用寵物食物碗食飯更加污糟。更令人擔心嘅係，呢兩類水樽超過98%嘅細菌都對人體有害，當中含有革蘭氏陰性菌，例如大腸桿菌，有可能引起肺炎和血液感染等疾病，甚至可以抵抗抗生素，對健康構成嚴重威脅。
飲管式水樽最乾淨 但仍有隱憂
出乎意料地，飲管式水樽嘅含菌量係四款之中最低，每平方厘米僅約25 CFU。研究推測，可能係因為水分滑落至飲管底部，令飲管口唔易滋生細菌。不過大家唔好開心得太早，家用廁所板嘅含菌量約為每平方厘米2 CFU，即係話即使係最乾淨嘅飲管式水樽，細菌量仍然比廁所板高出超過10倍。換句話說，四款水樽嘅含菌量全部都比廁所板更，只係程度上有分別。
膠水樽比不鏽鋼水樽更易藏菌
另一項學術研究進一步揭示，水樽材質亦會影響細菌滋生情況。PET塑膠水樽嘅微生物載量顯著高於不鏽鋼水樽，而直接以口部接觸水樽口飲水嘅方式，比非接觸方式嘅含菌量更高。研究團隊更發現，高達九成嘅使用者會直接喺水樽入面加水而不先行清洗，令細菌有機會不斷累積，形成生物膜，成為細菌嘅溫床。
專家醒你水樽清潔懶人包
專家強烈建議，水樽應該每日用完後徹底清洗，最好用熱水加洗潔精配合刷子刷洗水樽內壁同壺口位置，並確保完全乾透後先再使用。不鏽鋼水樽雖然相對較唔易滋生細菌，但如果唔定期清潔，同樣會成為細菌繁殖嘅理想環境。記得，勤洗水樽唔單止係為咗衛生，更加係為咗自己同家人嘅健康著想！由今日開始，養成每日清洗水樽嘅好習慣，遠離細菌威脅。
資料來源：treadmillreviews／PubMed Central
