文青 feel 早餐配搭 720 變

這店的全日早餐最大賣點是全部可以自選！麵包、主菜各選一款，還可從兩組配菜中，各選兩款食物，別看碟上只出現 6款食物，配搭起來竟可以變出 720 款配搭，食足幾個月都唔怕重複。十多款食物分成主菜 A、麵包 B、配菜 C 及配菜 D 四類，細食的可選 A + B + C 組合，想滿足感再大啲，可以揀 A + B + C + D。

TOOLSS'ALL DAY Breakfast $118
可以在 A、B、C、D 四類食物中，自組心水早餐，美食有西式、日式，吃出混搭滋味。這款有照燒雞扒 + 日式蒸蛋 + 香烤煙肉 + 牛角包 + 凱撒沙律 + 茄汁焗豆。雞扒用雞上髀，特地去肥膏挑筋，吃來啖啖肉，用燒汁醃 12 小時才以鐵板燒，香口；配埋早餐「稀客」日式蒸蛋，滑溜溜。

早餐中的「主菜」選擇也真夠多，包括香烤雞翼、德國香腸、煙三文魚、烤漢堡扒、焗釀大菇及照燒雞扒，最矜貴的要數烤漢堡扒，係日本鹿兒島 A4 和牛漢堡扒！漢堡扒簡單以鹽、黑椒來煎香，半熟最富油潤、肉汁滿瀉；德國香腸有法蘭克福腸、紐倫堡腸打孖上，來貨是生腸，烚熟了再煎，比平日的熟香腸花工夫。素食選擇有焗大菇，Kecoj 專程去菜欄挑選本地種啡菇，唔大隻唔揀，貪佢厚身 juicy，釀入攪拌了的雞髀菇、秀珍菇及鮮冬菇蓉，再加Mozzarella 焗到香噴噴，吃起來還可拉絲。

焗釀大菇 + 田園沙律 + 蒜蓉多士 + 香脆薯餅 + 煎蛋 + 香烤番茄 $118

配菜選擇共 9 款，單是蛋就有炒、煎及蒸。日式蒸蛋很的骰，用雞湯蒸煮，再撒點煙肉碎、黑椒提味；想吃沙律可揀田園沙律，有新鮮菠蘿車厘茄火龍果嫩菠菜火箭菜等，澆上意大利黑醋汁，醒胃，水果還按時令轉換，好 fresh！還可找到甚少作早餐配菜的麻醬菠菜，啖啖冰涼，麻香濃郁。歎早餐時別忘了點杯招牌咖啡 / 果茶，吃罷還可挑選喜愛的文具，唔，好有文青 Feel。


德國香腸 + 炒蛋 + 香烤番茄 + 田園沙律+ 蒜蓉多士 + 香脆薯餅 $118
雞肉做的法蘭克福腸，較脆口﹔紐倫堡腸質感軟身，由豬肉混合香草炮製；田園沙律集合時令蔬果，新鮮菠蘿、火龍果、bb 菠菜、火箭菜及車厘茄等，食得出的鮮爽，還以自家調校過的意大利黑醋汁提味，酸中帶甜。

炒蛋 + 蒜蓉多士 + 煙三文魚 + 麻醬菠菜 +茄汁焗豆 + 香烤煙肉 $118
炒蛋嫩滑，原來加入忌廉去炒；挪威三文魚頗肥美；麻醬菠菜亦是亮點，冷食清新，澆上日式麻醬份外滋味。

這裏比總店大，坐得闊落，整面牆都是 Kecoj 從日、韓、歐美、台灣等地搜羅的文具，深受文青喜愛，來吃早餐都特別有 feel。

原文摘自 U Magazine ISSUE 567

歡迎你 like 我哋 U Food Facebook Page / U Food Instagram ，取得我哋更新更快嘅資訊！