10款簡易豆腐食譜 蒸煮煎炸都有！麻婆豆腐／紅燒煎豆腐／蟹黃豆腐煲／豆腐芝士蛋糕

豆腐可以製作多樣化的家常菜。以下10款簡易豆腐食譜，用上板豆腐、硬豆腐等不同種類的豆腐，配合蒸煮煎炸不同煮法，做法簡單，涼拌前菜、主菜或甜品通通有！下列豆腐食譜最快15分鐘完成，各位廚房新手都可以試試這些簡單家常菜食譜啦～

豆腐食譜 1. 蟹黃豆腐煲

今日就教大家製作一個簡單家常菜，撈飯一流的平價版蟹黃豆腐煲，改用蟹柳及蛋黃，材料比較便宜，而且15分鐘就整到，各位新手想煮晚餐都可以試試這個簡易家常小菜啦！

蟹黃豆腐煲做法：

1. 豆腐切粒，汆水備用
2. 蛋黃蒸約10分鐘，加熱後壓成蓉
3. 落油後，放入咸蛋黃蓉炒香，然後分次加入蟹棒絲、豆腐、清雞湯、胡椒粉，鹽，最後亦可按個人喜好加入生粉水，上碟後可加入蔥花伴碟

 

豆腐食譜 2. 黃金咸蛋豆腐

咸蛋是近年大熱的食材，配上豆腐美味同樣好味，材料又平又抵食，大約$10就有交易，真是一個不錯的懶人食譜呢！

咸蛋豆腐做法：

1. 將豆腐切件，汆水備用
2. 咸蛋黃可蒸約5分鐘或放到微波爐加熱30秒，然後壓成蓉
3. 加入牛油和咸蛋黃蓉，放入豆腐拌勻
4. 加入紹酒、胡椒粉、鹽調味即可

 

豆腐食譜 3. 椒鹽豆腐

大牌檔的椒鹽豆腐可說是每次必點的菜式，但自己動手整同樣做到，喜歡吃香口「鑊氣」小炒就可以一試以下食譜！

椒鹽豆腐做法：

1. 先將辣椒、蔥、紅蔥頭、蒜頭切小粒備用
2. 將硬豆腐印乾水修後，切成小方塊
3. 粟粉混合黑椒，讓豆腐撲上薄薄一層的粉
4. 煎香豆腐，變成金黃色後拿起備用
5. 炒香蔥頭、蒜頭，放入豆腐、辣椒、蔥、椒鹽，炒均上碟即可

 

豆腐食譜 4. 麻婆豆腐

喜歡食辣的朋友，就可以試試這個川菜代表──麻婆豆腐，食起來辣之餘又十分醒胃，再配上一碗白飯簡直一流！

麻婆豆腐做法：

1. 先將豆腐切粒，並放入鍋中汆水
2. 加入油後把免治豬肉落鑊輕輕炒香，然後加入蒜粒、豆瓣醬拌均
3. 當豬肉炒至8成熟後，則可分次加入辣椒油、豉油、糖、豆腐、生粉水，待收汁後即可

 

豆腐食譜 5. 鮮蝦豆腐粉絲煲

最近天氣又開始轉冷，當然再吃一些暖笠笠煲仔飯食譜就最好不過。今次就跟大家製作一款簡單煲仔菜食譜－－「鮮蝦豆腐粉絲煲」，當中更會教大家製作濃郁蝦湯的秘訣，馬上開始啦！

豆腐粉絲煲做法：

1. 將蝦去殼去腸，蝦殼和蝦頭保留備用
2. 將蝦殼、蝦頭和蒜蓉落鑊炒香，加入雞湯中火煮約10分鐘，期間可輕輕壓出蝦頭的蝦膏，令湯底更鮮味
3. 撈起蝦殼後，放入粉絲、鮮蝦、豆腐，再加入紹酒、胡椒粉、鹽調味，中火煮約5-10分鐘即可

 

豆腐食譜 6. 紅燒豆腐

紅燒豆腐做法簡單，今次豆腐食譜用上板豆腐製作，另外亦可以按喜好使用硬豆腐，以方便將豆腐煎至金黃色，再加入冬菇等食材，各位新手們不妨整這個簡易家常菜食譜啦！

紅燒煎豆腐做法：

1. 將板豆腐每1cm厚切件
2. 混合生抽、蠔油、米酒備用
3. 豆腐印乾水份，下油將豆腐煎至黃色後，加入糖拌勻上碟備用
4. 放數片薑片，將豆腐回鑊，放入冬菇、調味料、清水及生粉水

 

豆腐食譜 7. 玉子豆腐金菇煲

玉子豆腐除了可以用來打邊爐外，亦可用來煮家常小菜！這個15分鐘玉子豆腐食譜──玉子豆腐金菇煲，做法簡單又易整，是個不錯的新手中式食譜呢！

玉子豆腐金菇煲做法：

1. 將生抽 、老抽、蠔油、胡椒粉、糖、紹興酒混合做成醬汁
2. 玉子豆腐切件，印乾水分。沾上生粉，燒熱鍋落油，煎香兩邊上碟備用
3. 蒜頭切碎落鑊爆香，落蔥花、免治豬肉、金菇炒香
4. 再放玉子豆腐及醬汁，冚蓋小火煮5分鐘待收汁，最後灑上蔥花

 

豆腐食譜 8. 脆皮椒鹽豆腐

脆卜卜又惹味的椒鹽豆腐是大排檔必食之選，今次就改良一下，用氣炸鍋整，減少油膩之餘，同樣亦外脆內軟，做法更簡單方便，新手都零難度！

氣炸椒鹽豆腐做法：

1. 硬豆腐切粒，印乾水份
2. 豆腐依次蘸上麵粉、蛋液和麵包糠，靜置5分鐘
3. 豆腐放入氣炸鍋，撒上適量椒鹽，以180度氣炸10分鐘即可

 

豆腐食譜 9. 涼拌尖椒皮蛋豆腐

相信不少譚仔的粉絲都會點尖椒皮蛋、蒜泥白肉等涼拌小食，尖椒皮蛋配上涼拌豆腐，開胃之餘又香辣，大家不妨試下！

尖椒皮蛋豆腐做法：

1. 先將尖椒去籽、指天椒、芫荽切粒
2. 皮蛋切小粒備用
3. 混合所有調味料，淋上豆腐上即可

 

豆腐食譜 10. 豆腐芝士蛋糕

除了主菜之外，豆腐亦可以用來製作甜品，這個豆腐芝士蛋糕食譜，不單簡單易整，而且也十分美味，蛋糕豆腐味道十分濃郁，但又不會太甜，新手製作一次就可以成功，大家不妨試試這個豆腐甜品食譜啦！

豆腐芝士蛋糕做法：

1. 將消化餅壓碎，加入牛油壓成餅底
2. 蒸煮豆腐汆水，再壓成泥狀
3. 將熱牛奶加入魚膠粉攪勻
4. 把已放軟的忌廉芝士攪拌，要分次加入糖、豆腐、牛奶溶液，然後倒入模中，放入雪櫃冷藏2小時以上