迎接 2013 最佳的方法梗係食到飽一飽，倒數過後繼續幫襯仲有美食醫肚嘅深夜食堂最好，所以今期以尖沙咀跟銅鑼灣兩大倒數熱點作為中心，分區推介你「後倒數」行到過去嘅宵夜食堂。
深宵撞明星
這間店是銅鑼灣代表 Super Girls 的心水選擇，咪睇間舖開喺樓上，好似好低調咁，實際店名係由 Wyman 改，係「用心做串燒」咁解，唔少明星名人都會在這裏打躉，好似王菀之及小儀都嚟過幫襯，倒數完畢想宵夜，順手仲可以撞吓明星。
這店同普通的串燒店好唔同，全因為老闆 Aska 同藝術家 Paul Fung 係鍾意玩嘢的後生仔，首先他們將這店變了半間串燒店、半間 Gallery，店分上下兩層，上層牆上會不時放了些本地藝術家的手筆做展覽，今期是老闆 Paul 的寵物素描，除夕夜你嚟到應該換咗小克的作品，而且仲加咗投射器，投射不同的藝術品，畀你邊食邊浸淫藝術中。
連串燒都不甘平凡，日式和川式串燒都有，但當中有唔少「玩嘢」的配搭，好像 Super Girls 最愛的蝦乾 x 燒雞翼、皇帝菜 x 沙律、酒釀 x 巨型雞子、豚肉 x 葡萄，連湯丸都可以拿去燒，芝士蛋糕又會拎去炸，好有創意，當然少不了平常在串燒店見到的大路 item，不過用料相當講究，用美國 prime 級牛小排、新鮮鷹鯧起肉，又用本土基圍蝦、黑松露、法國鵝肝等，醬汁都是自家調，唔會猛加孜然粉，倒數後仲有地方食番餐幾串靚串燒。
心燒食堂
地址：銅鑼灣駱克道 487 號駱克駅 22 - 23 樓
電話：2383 8686
凌晨韓風大餐
點解揀呢間？因為此舖開到 4:30am，倒數後唔趕住過嚟，仲有大把時間慢慢歎返餐。這店前身是著名韓國料理莊園，但去年由韓國人 Mr & Mrs Han 接手，Mrs Han 家族在韓國開料理店，接手後親自主理，連廚師都由港人變咗韓國人，菜式一改以往遷就港人的做法，變成韓國 Homemade feel 的小料理。
Mrs Han 很重視醬汁和湯底，由燒肉汁、石頭飯辣醬到海鮮湯都自家製，蘸燒肉的豉油不像一般韓國料理般用現成貨，反而用蘋果、梨子、薑、蒜、麻油及韓國醬油煮，燒肉汁口感 mild，蘸肉時不會蓋過肉味；石頭飯的辣醬質素也不俗，唔會超鹹死辣，是她用韓國 hot pepper、韓國黑椒及多款辣醬做，先甜後辣，而且辣味慢慢由舌尖滲出來，有層次有變化，撈飯好正。連泡菜都是她跟師傅自家製，用新鮮材料製，唔會勁鹹、勁味精，比較特別是兩種泡白菜，其中一款是 fresh Kimchi，很地道的韓國口味，泡菜免費送的，十分慷慨。
Han 夫婦還有一個特別任務，就是將店子每月部分收益捐出幫助韓國的孤兒，這善舉已做了 15 年，終極目標是賺錢在當地興建一所孤兒院，你幫襯也是功德，暴食都變得有意義。
泡菜園
地址：銅鑼灣謝斐道 500 號 1-2 樓
電話：2836 3877
(原文摘自《U Magazine》文：sieg、圖：May、Ki、Kam、Jay、lamlam)
