老闆天天親自去荳品名牌樹記排隊買腐竹，響鈴即叫即炸即做，唔係行貨水準；唔找供應商要貨，免得大量入貨食物水準有參差，反而特登去北河街同石硤尾街市買雞、蔬菜、豆腐和鵝腸等；又去九龍城街市錦記蛋莊買皮蛋；仲有去土瓜灣街市攞新鮮豬雜，有齊大腸、生腸、脆管、豬腳跟及豬肚尖等，好多人食過都讚呢度的豬雜無澀味又唔腥，食得出新鮮，為咗搵靚料腳骨力都嘥唔少。
店內設魚缸，部分海鮮屬街市貨，款式貴精不貴多，怕砸貨太多食落唔新鮮。近期有超肥美的泥鯭、黑鱲和本地鱆紅，可用來起肉打邊爐，鱆紅更可做刺身；還有水晶蟹和白蟹，更會在客人面前即撈花蟹來做番茄蟹鍋，見證花蟹生勾勾落鍋，不會在不知情的情況下吃咗死蟹都唔知。
湯底則非常講究時令，時時有變陣，好似早前天氣悶熱，就推冬瓜盅、蟹粥鍋及雞粥鍋等消暑湯底，入秋後知客人需要滋補，所以新近推藥膳湯底。近期必試的有當老火湯煲、自家磨製的杏仁豬肺鍋，還有燉足幾小時的牛坑腩煲，麻辣鍋也專登由四川空運辣椒來煮，食落足味絕對唔係味精水。
金潮榕
地址 : 深水埗福榮街 14 號地下
電話 : 2104 7088
(原文摘自《U Magazine》文：sieg、圖：Ken、May、Sky)
