往曼谷取經
最近在天后有間小店好搶眼，五顏六色，掛滿飾物，滿有泰國民族風，叫「泰國翟道翟街頭粉仔 」。老闆在同區開蛋包飯專門店，泰籍伙計燕姐不時烹調家鄉菜，老闆愈食愈上癮，乾脆跟她返曼谷旅行兼密集受訓兩星期，二人回港拍檔，開這泰式小店，賣泰式粉仔。
精挑泰國食材
燕姐還有姊妹在本地做泰國食品代理，店中所用的辣椒醋、炸蒜、芽菜、西米粉等，上至食材，下至調味料，都取得獨家靚貨，加上泰籍伙計幫忙煮粉麵和自製酸辣汁，做出正宗家鄉風味無難度。像泰式魚蛋，粒粒人手打足 1 小時至起膠，口感彈牙；熱食粉仔的清湯，用豬骨加甘筍、大葱頭等雜菜，放在網袋內熬，湯頭鮮甜之餘，更清澈如水，一點不肥膩。
心思日式配搭
向來創意十足的老闆，亦喜歡為傳統泰國美食增添新意。店中主打的街頭粉仔，可選配滑滑葛粉，它是一款比番薯粉健康、口感更煙韌的麵食，久放也不會發脹變腍，還配搭秘製日式叉燒！小食則有卡夫芝士做餡的炸魚條、似糯米糍的香口麻糬、海鮮金錢袋等，統統是自家創作，年輕人一定受落。
少吃辣的朋友，必試洛神花汁，特別加少許鹽帶出酸甜滋味，解渴解辣，好飲過酸梅湯！
泰國翟道翟街頭粉仔
地址：天后電氣道83號利景閣地下 7 號舖
電話：2806 1010
(原文摘自《U Magazine》文：Silva、圖：Yu)
