魚翅撈飯，正是七、八十年代香港經濟起飛的豪氣表現，也是本地潮州高檔酒樓冒起的時候。「嗰陣香港地好多潮州人都係企業家，做製衣、鐘表，個個都賺到錢，花得起錢食飯、請客。之前無潮州酒家有得食魚翅、燕窩呢啲高級嘢，金島係開創先河。」入廚超過 40 年，祖籍潮州潮安的金島燕窩潮州酒家總廚師吳木興師傅說。酒樓在1977年在尖沙咀河內道開業，現址是82年開設的分店，也是現存歷史最悠久高檔次的潮州酒樓。
4拼盤 6大菜
「嗰陣時係潮流，啲人開始識得食鮑參翅肚燕窩，我又做過海鮮酒家，將做海鮮蒸魚嘅經驗帶入嚟金島，提升咗酒樓嘅水準；而家興食烤響螺，都係我帶起嘅。」吳木興師傅續道，「以前潮州人嘅筵席，係 4 拼盤加6大菜，都係大大碟；4 拼盤譬如蝦棗、蟹棗、海蜇、發財卷。呢款發財卷要好多功夫，髮菜用上湯煨過，加埋蝦膠、欖仁、馬蹄等好多樣嘢，捲埋蒸熟再切件。」
食完小菜就到6大菜，「我哋係先食翅，紅燒翅或者肘子翅，多數係用翅針粗嘅五羊片，同靚上湯一齊煨，翅身夠晒軟滑。然後飲啖功夫茶清咗啲味，再嚟就鮑魚、龍蝦或者蒸魚；再到湯菜，呢款湯菜都係功夫菜，譬如太極天河素、高湯荷包鱔；再到雞、時蔬，最後係單尾，好似蒸包、甜品、伊麵。而家無以前咁多餸，一席大約8個菜。」上圖（$150）芋泥香酥鴨，鴨肉炆過再去骨拆肉壓平，鋪上混合了磨成粉末的蝦米和葱粒的芋泥，便拿去炸。外層香口酥化，芋泥本身香軟，伴鴨肉來吃鹹中有甜。
至今潮州菜不再高不可攀，菜館亦加入高級筵席菜、功夫菜；不過，誠如吳師傅說，功夫菜已經買少見少，識煮、識食的人也愈來愈少了。
金島燕窩潮州酒樓
地址：尖沙咀梳士巴利道星光行2樓東座
電話：2736-6228
（原文摘自《經濟日報》 文：陸悅 圖：曾耀輝）
