Haru & P 呢個名好熟啵！如果你有去葵涌廣場掃街，一定會認得長過手臂嘅鐵塔窩夫。可惜葵廣嘅 Haru & P 已經無做了，美孚呢間「美食堂Haru & P」係佢嘅延續。餐廳以淺啡色做主調，空間比茶餐廳闊落。 舖頭除咗 keep 住賣鐵塔窩夫外，仲加推一系列賣浮誇嘅巨型菠蘿包。
店主 Fiona 好怕悶，食得多菠蘿包同菠蘿油，就諗到將菠蘿包 size 加加加大， 重足半磅、直徑接近 15cm！ 單睇 size 已經令人嘩嘩聲！大過小記塊 pizza 面，我都嚇親！ Fiona 搵本地麵包廠製作巨型菠蘿包，由於中間要夾餡料， 所以麵粉比例經特別調整，皮脆脆、中間軟熟， 食晒成個無咁飽滯。
焦糖鮮牛油 $33
餡料方面，原來最初 Fiona 只是想將菠蘿油 upgrade。 於是在室溫牛油內加入焦糖醬， 製成甜甜哋又有焦糖香的牛油。 焦糖牛油夾於烘熱過的菠蘿包中間，變成半融狀態， 軟滑到好似 cream 咁！
紫薯菠蘿 $33
另一熱賣之作，梗係紫薯配菠蘿片啦！ 菠蘿包中間唧上厚厚的紫薯蓉，稍為用力拎起個菠蘿包， 紫薯蓉都會擠晒出嚟！由於紫薯比較飽滯， 所以加兩片煎香的菠蘿片增添酸甜味，清新啲！
廚師每日將新鮮紫薯烚熟去皮，再加少許忌廉及糖粉打成紫薯蓉， 絕對是無添加，食番紫薯原味，口感好幼滑。
【相關報導】
超萌搞鬼 喵星人紫薯包 + emoji 流沙包
超萌搞鬼 喵星人紫薯包 + emoji 流沙包
日式照燒雞扒 $38
呢個簡直是菠蘿包界嘅巨無霸！厚厚的雞扒跟菠蘿包一樣咁大塊， 加埋日式小丸子醬汁及自製的青芥末沙律醬，微辣醒胃。
雞扒完全覆蓋菠蘿包，超大塊！食落好 Juicy， 加埋日本鰹魚乾，鹹香惹味。
芒果忌廉芒果粒 $33
甜食巨無霸除咗紫薯菠蘿外，推介芒果忌廉芒果粒。芒果忌廉以芒果醬加鮮忌廉打成， 有淡淡的芒果味，質感輕巧，Cream 表面鋪滿新鮮芒果粒。 下次有朋友生日想搞新意，買呢個菠蘿包做蛋糕啦！
蝦麵 $58、$55（午市包飲品）
餐廳有新加坡廚師坐鎮，唔少得一系列星馬泰菜式。 蝦麵湯底以大量炒香的蝦頭、蝦殼、蝦膏、乾葱、 蝦米及馬拉盞等煮成，蝦味濃郁。配 3 隻大蝦、魚及魚片，抵食。
榴槤綠豆沙 $26
糖水無秘密配方，用料夠就好吃。好似呢碗綠豆沙， 半斤分量就用咗至少一個榴槤肉。 每一羹都食到絲絲的榴槤肉，綠豆起沙又有榴槤香， 細心嗒真仲有陣班蘭葉的清香。好特別喎！
豆腐花紅豆冰 $24
健康版紅豆冰，底層有半杯是滑嘟嘟的豆腐花，中間有紅豆粒。健康啲，因為用咗豆漿取代椰奶，味道 light 啲。
諗頭多多的 Fiona 再拎出剛剛研發的甜品。底層是麥香重的黑啤， 入面有荔枝及椰果粒。面層再唧一堆 cream，一啖一杯， 好過癮！
美食堂 Haru & P
地址：美孚美孚新村第七期萬事達廣場地下 N51 號舖
電話：6932 0038
營業時間：7am-11pm
文：Jessie 攝：Jay
【相關報導】
創意爆棚！菠蘿包炸豬皮 burger
創意爆棚！菠蘿包炸豬皮 burger
歡迎你 like 我哋 U Food Facebook Page / U Food Instagram ，取得我哋更新更快嘅資訊！
