呢間日式芭菲甜品店叫「宮葉」，由港人拉麵店老闆，夥拍東京甜品師傅宮本先生合作開設，宮本師傅曾在千代區一間和菓子老店工作多年，亦有在芭菲店工作經驗，於是將傳統和菓子結合洋風芭菲的風格帶到店中。
店內的芭菲有廿款之多，令人患上選擇困難症！芭菲可選自家製軟雪糕或乳酪 base，雪糕有北海道 3.6 牛奶及抹茶口味，入口好滑溜。不同款式分別用上多種新鮮生果，如芒果、菠蘿、紅桑子、橙、西柚、木瓜、黑車厘子、青蘋果、火龍果、士多啤梨、燒香蕉等，色彩繽紛，生果大大粒又足料。
最受歡迎當然是抹茶口味芭菲，入面的抹茶軟雪糕、抹茶蛋糕、抹茶厥餅、抹茶果凍、三色白玉及焦糖餅全是自家製，仲要用貴價 A 級宇治抹茶粉，抹茶味清香不澀。除了芭菲，更有多款自家製洋風蛋糕甜品、生果批，性價比都幾高。
士多啤梨呍呢嗱雪糕芭菲 $48
芭菲最 kawaii 係呢款，熊貓樣係由 Dreyers 呍呢嗱雪糕球，加上朱古力做的眼耳鼻扮成。圍邊的士多啤梨花加上紅桑子脆脆，底下再以忌廉、芒果、蜜瓜、呍呢嗱奶凍及蘭香子層層疊砌成，好大堆頭！生果分量比忌廉多，清新唔覺膩。
日式精選乳酪芭菲 $50
材料好豐富，有抹茶軟雪糕、抹茶蛋糕、抹茶厥餅、抹茶果凍、三色白玉、十勝紅豆、桃、火龍果及焦糖餅。雪糕抹茶清香，茶味天然順喉，唔會太甘，牛奶味並沒有搶過抹茶味。蛋糕就略嫌少少乾身，抹茶味就一般。厥餅煙煙韌韌，感覺好和風。果凍抹茶味都幾天然清爽，白玉咬落幾柔韌，焦糖餅勁脆！紅豆粒粒飽滿不太甜，桃肉好多汁清甜。由於芭菲內裏還夾雜咗火龍果，易出水，所以記得要先食抹茶軟雪糕呀！
日本紫薯雪糕芭菲 $48
最上高是勁濃郁的紫薯蓉，伴上三色白玉、士多啤梨及百力滋；下層以抹茶雪糕、芒果及自家製紅豆果凍組成，芒果鮮甜，紅豆果凍豆味頗濃厚。一杯有齊脆、軟、滑、爽不同層次口感。
綠茶精選 $60
心心形的自製寒天釀櫻花，寒天爽滑清新，帶天然櫻花香。抹茶甜點則有抹茶厥餅、抹茶蛋糕、抹茶雪糕球。仲有三色白玉串、焦糖脆餅及十勝紅豆。和風甜點更附上綠茶汁及黑糖汁，前者適宜蘸厥餅及淋上雪糕食，增強抹茶味；後者專配清淡的寒天，添上蜜香。
宇治綠茶木糠布甸 $42
呢款甜品幾好味，抹茶忌廉好幼滑，瑪麗餅碎磨得勁幼細，五層餅碎夾四層抹茶忌廉，味道好match，各層比例剛剛好。
關西叉燒拉麵 $52
選用日本入口的藍天拉麵，攣曲狀，很掛湯。關西直送的叉燒豚味濃，豚骨湯膽也從日本運來，奶白色，湯味帶微甜，美國蛋呈溏心狀態。
小店採和風木系設計，一邊散枱，一邊一排獨立座位。
宮葉
地址：太子西洋菜南街 240 號
電話：2441 3686
營業時間：11am-12:30mn
文：Vera Gee、攝：Paul
歡迎你 like 我哋 U Food Facebook Page / U Food Instagram ，取得我哋更新更快嘅資訊！
