長沙灣廣場開咗間果汁專門店 Juice App+，一枝枝果汁放喺櫃內，用冰粒保持溫度。遠遠望過去，又黃又紅又綠嘅果汁 show 晒出嚟，又真係幾吸睛！每逢 lunch time 都畀 OL 們重重圍困！其實附近都不乏果汁店，點解呢間咁受 OL 歡迎？原來 Juice App+ 嘅果汁標榜採用冷榨方法製造，絕對唔係賣靚樣咁簡單。
(Juice_
一般榨汁機，用機內嘅刀片以高速轉動將蔬果打爛，於過程中機身會發出熱力，影響蔬果中嘅養分；纖維、養分流失後，剩下只得糖分，飲得太多隨時增肥！根據店員介紹，店內嘅所有果汁都是於香港工場製作，利用冷榨果汁機以壓力將蔬果慢慢壓成汁。咁就可以避免機器釋放出熱力，保留蔬果中嘅營養，亦能夠避免高速攪拌或壓榨時造成的快速氧化。
富士蘋果 $12
冷榨處理之外，果汁仲有另一個賣點！細心睇睇，店內 10 款果汁全部以蘋果做 base！店員解釋，原來品牌於陝西設有自家果園。用嚟製作果汁嘅富士蘋果，於海拔 1,300 米高的陝西高原種植，採用有機肥料種植、無使用化學農藥。加上種植環境污染少啲又可以做到源頭追蹤，飲得放心！
蘋果可以原個買走，蘋果表面無打蠟，果皮唔係令立立、反晒光！果肉白雪雪，味道清甜多汁，果味清香。但氧化速度比較快，記得即切即食。
（左）Juice App+ 04 $28
（右）Juice App+ 07 $28
店員話最好賣嘅係加咗苦瓜或芹菜嘅蘋果汁，最啱平時少食蔬菜嘅朋友仔。加咗苦瓜嘅Juice App+ 04，苦瓜味好濃，帶點回甘，好在蘋果嘅甜味可以中和到苦味。芹菜蘋果汁Juice App+ 07 飲唔到芹菜嘅草青味，都算易入口！
Juice App+ 05 $28
紅色嘅 5 號仔夠搶眼，佢以蘋果、紅菜頭、紅蘿蔔、檸檬及薑 mix 成。首先會飲到紅菜頭嘅清香，然後會滲出蘋果及薑嘅香味，層次豐富。
Juice App+ 10 $28
如果怕蔬果嘅味道，可以揀番入門版嘅水果配搭。呢枝蘋果加奇異果，可以咬到粒粒奇異果籽。店員話所有果汁都無添加劑，無加糖或人造色素，味道夠甜夠天然。
Juice App+ 02 $28
除咗蘋果 base 之外，果汁店趁秋天推一系列以梨做 base 嘅果汁。呢款梨加檸檬係最 basic 嘅配搭，品牌選用貢梨榨汁，梨味突出仲可以嗒到梨蓉，飲完喉嚨好舒服。
蘋果角 $22
果汁以外，店內仲有兩款蘋果乾。呢款蘋果角比較厚切，質地軟身、咬到蘋果嘅纖維，果味較香濃。
蘋果脆片 $18
另一款蘋果片係薄切、脆身，蘋果片於香港製作，蘋果去皮、去芯及切片後再風乾脫水，過程中不另加糖，屬 guilty free 零食！
果研方 Juice App+
地址：長沙灣廣場 2 樓 K3 舖
電話：9281 2857
營業時間：星期一至五 11am-7:30pm，星期六及日 11am-5pm
文：Jessie 攝：keeyau、Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
