呢個「菠蘿撻」係天樂烘焙出品，不過原來唔係所有分店都有，記者去過鰂魚涌分店就唔見撻嘅蹤跡。唔好灰心，去灣仔店一定搵到。店員話菠蘿撻每日大約 10am 出爐，下晝會再出另一轉，不過出爐時間要視乎菠蘿撻嘅銷情而定。
菠蘿撻 $8
呢個撻嘅外型似足蛋撻，不過佢唔係放喺蛋撻隔籬，而係放於麵包櫃入面。睇真啲，個撻面仲放咗片菠蘿，真係有菠蘿喎！
撻嘅旁邊沾上杏仁片，杏仁片唔算脆身，味道好甜，應該有用糖烤烘過。
將個撻拎出嚟，原來底部仲有一層牛油撻皮。
食一啖，終於揭開佢神秘面紗！牛油撻皮好薄身，上面果層好似菠蘿皮，可惜唔係！食落微微鬆化，好似烤烘過的蛋糕或麵包表皮，幸好有杏仁片增添口感。或者菠蘿撻嘅外表太似蛋撻，搞到小記以為中間有蛋漿。原來表面令立立嘅唔係蛋漿，而係一層糖漿。咬落去，又無蛋，取而代之全是牛油蛋糕！
呢一刻，我終於明白點解菠蘿撻唔係放喺蛋撻櫃入面！不過，撻中間的蛋糕充滿牛油香味，質地鬆軟唔糊口，都幾好食嘅。唯一要挑剔嘅，係撻皮嘅菠蘿片實在太薄，薄到食唔到菠蘿味。都怪我想像力太豐富，一開始衝着菠蘿皮而來！不過諗到將菠蘿 + 蛋糕 + 牛油撻變成菠蘿撻，呢間麵包店都算創意爆燈㗎喇！
天樂烘焙
地址：灣仔天樂里9-17號兆豐大廈D舖地下
電話：2893 5350
營業時間：7am-9pm
文、攝：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
