1. 阿華田夾心餅
唔講唔知，好多人去泰國旅行都會買阿華田夾心餅做手信，原來香港嘅零食店都有得買。Oreo size 嘅阿華田餅帶有麥香味，咬落脆口，中間夾住朱古力醬，甜度適中，不過阿華田味無想像中咁濃，tea time、煲劇時食就啱。
阿華田夾心餅 $ （a）
2. 阿華田奇脆杯
去聖安娜買麵包，竟然發現呢款阿華田奇脆杯。店員話其實推出咗一段時間，反應不錯㗎！奇脆杯由朱古力蛋糕、阿華田慕絲同阿華田麥香脆層組成，軟、滑、香、脆層層疊。面層仲加咗阿華田啫喱同阿華田曲奇餅，口感食味豐富，好滋味！
阿華田奇脆杯 $20（b）
3. 維記迷你雪米糍（阿華田味）
一盒 4 粒嘅華田雪米糍，粒粒都有獨立包裝，吃得方便。雖然雪米糍得雲吞咁大粒，勝在皮薄又煙韌，阿華田雪糕味道濃郁，兩者好夾，一口一粒，食得滋味過癮。
維記迷你雪米糍（阿華田味）$8 （c）
4. 阿華田甜筒
阿華田甜筒嘅包裝用番招牌橙色同深藍色，夠搶眼又易認。阿華田味道好濃，最讚係唔太甜兼融得慢，可以慢慢嗒。
阿華田甜筒 $8.5（c）
5. 阿華田營養麥芽朱古力威化 $5
7-ELEVEN 推出咗阿華田營養麥芽朱古力威化，包裝寫着有 10% 麥芽精華，不過阿華田味道唔算濃，朱古力味反而重啲，似朱古力威化多啲喎。
阿華田營養麥芽朱古力威化 $5（d）
6. 機智豆
小編細個成日食嘅機智豆原來而家仲有得賣！一 pack 有 5 小包，包裝設計雖然同以前唔同咗，不過味道就差唔多，阿華田味濃郁，好似飲緊阿華田咁，一邊食一邊回味童年。
機智豆 $12.6（e）
7. 阿華田脆醬
阿華田控對阿華田脆醬應該唔陌生，味道似朱古力醬，同麥提莎脆醬一樣，重點喺啲脆脆！最啱用嚟搽麵包餅乾，厚厚一層咁搽上去，食落脆卜卜，好有口感。係呀！係咁邪惡㗎喇！
阿華田脆醬 $33 （f）
同場加映：阿華田泡芙 + 鬆餅
除咗香港，台灣都有阿華田嘅小食，有泡芙布丁鬆餅，仲要喺便利店就買到，好羡慕呀！有無人去開寶島可以外帶番香港畀我？（哭）
8. 阿華田巧克力麥芽泡芙
泡芙細細粒，餡料係朱古力麥芽醬，食過嘅台灣網友話皮薄餡多，麥芽味濃但唔膩，不過唔好放入雪櫃，個泡芙皮會腍咁話喎。
阿華田巧克力麥芽泡芙（6粒）（g）（圖片來源︰vancyfoodie @instagram）
9. 阿華田巧克力麥芽鬆餅
如果香港有，食呢個鬆餅做早餐都唔錯！鬆餅餡除咗有朱古力 cream 外，中間仲有一抹阿華田醬，朱古力味融入鬆餅度！據說冷藏後會仲好味喔！
阿華田巧克力麥芽鬆餅（g）（圖片來源︰arkchung @instagram）
10.阿華田巧克力麥芽布丁
寶島居民對呢個朱古力色阿華田布丁啲 comment 都麻麻，話食落似巧克力味多過阿華田，而且味道偏甜，睇嚟佢哋唔係好受落喔。
阿華田巧克力麥芽布丁（g）（圖片來源︰wen8161 @instagram）
售買點：
a. 糖街
地址︰旺角旺角中心 3 樓 TK5A
電話︰6076 6976
b. 聖安娜餅屋
電話：2991 6677
c. OK便利店
電話：2991 6337
d. 7-ELEVEN 便利店
電話：2299 1110
e. 華潤萬家
電話：2827 8333
f. 優品 360
電話：2755 7777
g. 台灣 全家便利商店
文、攝：Louise
歡迎你 like 我哋 U Food Facebook Page / U Food Instagram ，取得我哋更新更快嘅資訊！
