Johnson Ko
今日為大家點評 5 款罐裝咖啡嘅係 Johnson，他是香港著名咖啡店 CoCo Espresso 創辦人，曾到澳洲學打奶技術，於香港有 4 間咖啡店，更添置炒豆機，親自烘焙咖啡豆供應各分店之用。
評分標準
罐裝咖啡買完拉開蓋即刻飲，即時止到咖啡癮，仲迅速幫你提神，真係好方便。雖然罐裝咖啡嘅味道層次點都唔及機沖、手沖咖啡，但身為咖啡精絕對唔可以飲得咁求其！我相信當中總有啲係高品質嘅。今次 battle，咖啡師 Johnson 會用以下準則嚟評分：
1. 甜度：奶啡有適當嘅甜度是必須，因為甜味可以提升奶嘅香味，又可以平衡咖啡嘅苦澀，但絕對不可以過甜。
2. 奶味：奶、咖啡嘅比例要做得好，唔會有勁濃奶味，咖啡味道又唔可以濃到蓋過奶味，兩者要互相平衡。
3. 苦味：呢項可以從咖啡濃度反映，咖啡含量過多，奶及糖嘅分不足以平衡，會令咖啡出現苦澀味。另外又可以測試咖啡嘅酸度。
測試工具：
單靠條脷都仲未夠！Johnson 用埋測試咖啡濃度嘅機器出嚟，check 真每罐嘅咖啡含量！將咖啡倒於測試位置上，再根據光嘅折射、有幾多光能穿透咖啡嚟評估咖啡含量。不過，呢部機器其實係用於測試黑咖啡之用。對於有奶又有糖嘅即飲咖啡，於測試其咖啡濃度會有影響，所以數據只供參考！明白晒嘅話，比賽開始！
1. UCC Blended 牛奶咖啡 $5.9/a 5分！
咖啡師點評：
甜度：**（5 分為標準）
甜度唔算太高，但由於飲落無乜咖啡味、苦味、酸味，甜味就明顯突出，所以飲落感覺都幾甜！
奶味：**
咖啡味欠奉嘅情況下，奶味比較突出，有種奶水溝糖嘅感覺。
苦味：*
咖啡濃度只有4.29%，是咁多款咖啡之中含量最少嘅一款，所以飲落無咖啡味、無落味，只得甜及奶味，而酸味都是唔太明顯。
2. 麒麟 Fire 咖啡拿鐵 $9/b 9分！
咖啡師點評：
甜度：****
甜度適中，唔會有過甜或飲糖水嘅感覺。
奶味：**
飲落好 milky，奶味明顯。不過奶嘅味道有啲古怪，味道唔太討好。
苦味：***
咖啡沒有苦澀味，不過咖啡味明顯比第一款嘅 UCC 突出。根據機器測試，其咖啡濃度約為 10.9%，所以呢罐無乜奶水溝糖嘅感覺。
3. UCC 精製拿鐵 $15/b 11分！
咖啡師點評：
甜度：*
甜度相當高，是咁多款咖啡之中最甜嘅一款。
奶味：*****
與第一款 UCC 咖啡唔同，呢款用咗北海道牛奶製作。飲得到有奶嘅香味，而且口感明顯比其他咖啡順滑得多。
苦味：*****
苦味明顯多啲，根據機器測試數據，咖啡含量為 14.12%，是咁多款測試咖啡中含量最高嘅咖啡，所以咖啡味明顯突出、味道濃郁，真係飲到咖啡味而唔係苦澀味。
4.DYDO 混合風味牛奶咖啡 $10/b 10分！
咖啡師點評：
甜度：*****
甜度唔算高，味道剛剛好！
奶味：***
有奶味，但味道唔算太濃。
苦味：**
咖啡濃度約為 8.76%，根據數據顯示，咖啡含量是排尾二，所以無乜苦味，不過咖啡味都唔算淡，而且其酸度是最明顯嘅一罐。酸味柔和、唔嗆喉，令咖啡味道更有層次，多咗一種清爽嘅感覺。
5. Cafe Bene 經典牛奶咖啡 $8/c 9分！
咖啡師點評：
甜度：***
唔算好甜，甜度屬於適中。
奶味：**
奶味一般，飲到有奶味但唔太突出。
苦味：****
咖啡濃度約為 11.19%，咖啡濃度為排第二。咖啡有明顯苦味，除咗跟咖啡濃度有關之外，亦可以是咖啡豆烘焙度太深，或糖分較少，令苦澀味明顯，而且仲有種 dirty 口感，雜味好多。
比賽結果：
UCC 精製拿鐵 勝！
咖啡師點評咖啡時，經常提及到平衡度。其實咖啡含量唔係愈多愈好，仲要睇吓咖啡嘅甜、酸、苦味嘅比重是否一致，唔會淨係飲到苦味或酸味！對於奶啡而言，當然要講究埋咖啡及奶嘅比例啦！試飲咗咁多款，Johnson 認為用咗北海道牛奶製作嘅 UCC 精製拿鐵勝出！咖啡味好夠、唔會搶走奶味，甜、酸、苦三者味道最 balanced。咖啡入口明顯比較順滑，質感厚實。唔夠瞓飲佢就最啱喇！
特別推介：DYDO 混合風味牛奶咖啡
假如你唔係一味想提神、想飲層次多啲嘅咖啡，推介大家試吓 DYDO 混合風味牛奶咖啡，作佢酸味突出而且柔和，同樣是易入口的咖啡。咖啡的酸味令整體感覺變得更加清爽，雪凍佢嚟飲就夠消暑！
銷售點：
(a) 759阿信屋
電話：3960 9300
(b) 橫丁
電話：2572 3199
(c) 7-ELEVEN
電話：2299 1110
文：Jessie、攝：Jay
歡迎你 like 我哋 U Food Facebook Page / U Food Instagram ，取得我哋更新更快嘅資訊！
