花園街 Modos 嘅雞蛋仔一向創意十足，除咗超人氣嘅芝士及流心蜂蜜雞蛋仔之外，最近再有新搞作，推出辣味雞蛋仔！呢款雞蛋仔仲分有兩種辣度，圖中最左是大辣餡料，中間是辣度少一半嘅小辣。餡料嘅製作一啲都唔求其，將洋葱及大蒜切成細粒，辣椒乾及蝦乾連皮剪成小塊。然後將葱蒜粒炸到金黃色，再落蝦乾及辣椒乾炒勻，最後加入秘製香料以慢火拌勻。
製作呢底辣辣雞蛋仔需時3分鐘，首先於原味蛋漿上加入2.5匙辣味蝦乾餡料。
再放大量原味肉鬆。
睇吓啲料鋪到密麻麻，真係超足料！
肉鬆蝦乾雞蛋仔（大辣）$23
大辣雞蛋仔真係辣到噴火，係焗製時已經有嗆鼻嘅辣味，一咬辣味即時湧出，辣到眼水鼻水一齊流！自問無辣不歡嘅辣妹先好去挑戰！
肉鬆蝦乾雞蛋仔（小辣）$23
辣到條脷都痺埋，都係食返小辣穩陣啲！辣度溫和唔會蓋過蛋漿味道，用葱蒜炒過的蝦乾好惹味，肉鬆又唔會好鹹，值得一試！
唔好嗜辣嘅朋友，可以揀同樣是首推嘅宇治金時雞蛋仔。每底雞蛋仔都加咗 6 克日本綠茶粉 mix 成，再加日本紅豆粒做餡。
字治金時雞蛋仔 $25
綠茶味雖然較淡，但食落有種茶味嘅回甘。紅豆香甜軟腍，唔錯。
伯爵雞蛋仔 $23
茶味雞蛋仔仲有伯爵茶口味，蛋漿內加入 3 克打成粉狀嘅伯爵茶葉，食落茶味清香，可以中和雞蛋仔嘅甜膩感。
每粒雞蛋仔入面都滿布伯爵茶葉粉，難怪茶味咁突出！
特濃碎朱古力摩豆沙冰 $28
店子最近更加推多款沙冰，朱古力控必試呢款特濃碎朱古力摩豆沙冰，用中量朱古力加奶及冰粒打成，味濃之餘仲啜到朱古力粒，難得味道唔會過甜，讚！
白桃摩豆冰 $18
果系沙冰都是店內嘅人氣之選，以白桃果蓉打成嘅沙冰，加入少許紫貝天葵糖漿點綴。桃味突出，感覺好消暑。
蜜瓜摩豆冰 $22
仲有呢款蜜瓜味飲品，同樣以果蓉製作，顏色好 sharp，味道夠晒 fresh！
Modos 摩豆
地址：旺角花園街174號A1舖
電話：2833 5618
營業時間：12nn-11pm
備註：旺角中心分店同步發售
文：Jessie、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
