呢間向三多挑機嘅炸髀店叫「好好食品」。門口有好大個易拉架寫着「一巴拳生炸雞髀」，仲要係必食之選！因為只做夜市，舖頭 8pm 先開門，現場已經有人等緊外賣，門外仲有叔叔們食雞髀兼隊啤。
先叫咗隻「一巴拳生炸雞髀」($35)，因為生炸關係，要等 10 分鐘左右，即刻用手掌度一度 size 先！真係有成隻手掌咁大！Well, UFood 係好認真專業咖嘛，我就用埋軟呎去度下啦，結果闊度有成 21 cm 咁長，即係接近 8.5 吋咁大隻，莫過話手掌，好多女仔腳板仲細個隻雞髀！
聽聞好好食品嘅炸雞髀，同隔離舖「三多」班底有關，我八卦過，夥計只係笑笑口話「食咗咪知囉」。都係靠自己把口親試！入口好香脆，我平日唔會食雞皮，都因為炸得好香，結果連皮食埋（肥就肥啦）！雞髀可以揀辣同唔辣，如果唔想食咁大隻，可以揀「原祖炸雞髀」（$20）。
除咗食炸，見到在場食客枱面都有碟「麻辣雞翼尖」($40)，又叫一碟試下，辣得香口，蒜蓉辣椒調得入味，甚至比 B 仔涼粉的味道更好，另一個驚喜位。重口味食物之外，我仲叫咗杯特飲「腦震盪」($26)，聽個名都覺得勁，其實係梳打汽水溝鮮芒果肉，加上檸檬汁，味道又酸又甜又爽，中和番炸髀嘅熱辣感！雖然呢個宵夜餐好邪惡，但「愈夜愈有饑」是常識吧！
無論打橫打直量度，都有 21 cm 咁長，同手掌咁大！
小記塊面 size 適中（應該係，除非唔係），但炸髀都大過我塊面。
外皮夠脆，雞肉唔太老，辣得惹味。
麻辣雞翼尖係驚喜位，在場食客都叫一碟，食落比 B 仔涼粉雞翼尖更好。
「腦震盪」飲完唔會出事嘅，只係梳打 + 鮮芒果 + 檸檬汁，成個人爽晒！
除咗炸髀，宵夜仲有粉麵河、粥、糖水、小食炸物拼盤等等，睇見真係愈夜愈饑。
見到門口嘅易拉架就知必試「一巴掌生炸雞髀」！
好好食品
地址：大埔北盛街 15 號地下 A 舖
電話：2657 1186
營業時間：8pm-3am
文、攝：Ceila
歡迎你 like 我哋 U Food Facebook Page / U Food Instagram ，取得我哋更新更快嘅資訊！
