位於中環卑利街的何蘭正，真係好鬼正！走復古路綫，裝修設計以六七十年代的舊香港為靈感，綠白階磚牆，襯上懷舊霓虹燈、舊風扇及掛牆鍾，打咭自拍不錯。但食物方面就一點都不懷舊，更如店名玩諧音般玩嘢，好似將蘆筍及芥蘭製成沙律，今次介紹呢個熱狗更搞鬼，係油炸鬼熱狗，以油炸鬼代替麵包炮製。
Lobster Hotdog $158 選用新鮮波士頓龍蝦，非常彈牙新鮮，再配上酸辣醬汁，感覺好夏天，一點都不覺得油炸鬼的油膩感。
熱狗內唔係 cheap cheap 香腸，係新鮮波士頓龍蝦，混合越南魚露、青檸、辣椒及荷蘭醬汁（法式牛油汁），最後灑上四川花椒，配搭好 fushion；越南魚露及青檸的酸鹹味令龍蝦鮮味更突出，龍蝦亦很彈牙，加上油炸鬼的香脆及帶麻勁的四川花椒，味道複雜得來卻好搭調，而且好醒胃。
老闆話：「一講起熱狗，大家都會諗起麵包，我哋菜式係玩開 fushion，諗到大家食油炸鬼時只會覺得配白粥，所以忽發奇想，將油炸鬼製成熱狗，點知又幾 match 喎！」一口脆卜卜熱狗，一口本地手工啤酒，爽！
除了大玩 fushion 菜，店內有不少本地製造的手工啤酒，選擇甚多。
天氣炎熱，最好飲番杯啤酒降降油，今次試過店長推的兩款本地手工白啤：Orange Crush Juicy Saison（左），帶有微微橙味，感覺好 fresh，而且不太苦，適合女士們。Momento Saison（右），有少許熱情果及桃味，較苦澀，男士最啱。各 $80/450ml
從牆身設計到店內擺設都有甚六、七十年代舊香港的感覺，可以 hea 吓飲杯啤酒，打吓咭呃 like。
何蘭正
地址：中環卑利街 65 號
電話：2342 2224
營業時間：星期一至六 4pm-12mn、2pm-12mn
文：theo、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
