時下乜都搞放題，日韓中西、素食餐廳，甚至潮州打冷都有放題，點解榴槤唔可以？我講緊係馬來西亞榴槤專賣店「榴槤BB」與馬來西亞聯邦農業促銷局 (FAMA)合作，於上星期搞咗 5 場嘅榴槤放題！當中有 5 款不同品種的原個新鮮榴槤即開即食，一盤盤奉上畀你任食！榴槤癡一定過足癮！
榴槤 BB 主辦嘅放題可以話係香港史上第一次，消息一出即時引嚟大批榴槤控乖乖畀錢入場支持。唔係講笑、絕對無誇張，未正式去到會場，喺地下大堂等緊，已聞到陣榴槤味，心諗今次放題應該唔少嘢，令身為榴槤控嘅我更加期待！
(左起)老樹貓山王（D197）、蘇丹王（D24）、金包（D13）、紅肉（D101）、純種老樹（888）
2 小時嘅放題，可以食到純種老樹（888）、紅肉（D101）、金包（D13）、蘇丹王（D24）及老樹貓山王（D197）5 種榴槤。放題開始時，每人會有一碟有齊 5 種榴槤嘅 tasting set。試清口味再目標為本咁 order，每次都係一盤盤咁上，食到你嗌停為止！
問負責開榴槤嘅哥哥仔，開咗幾多個榴槤，佢冷笑一吓再淡淡然拋一句：「每場至少開 200 個。」難怪開榴槤開到手瓜起腱！
呢場榴槤放題絕對唔係 gimmick 咁簡單，負責人 KK 表示，他今次用咗兩架貨機，由馬來西亞彭亨洲與當地農民合資嘅榴槤園，將 2.8 噸榴槤，即是 1,800 個榴槤運到港，陣容鼎盛。
KK 預計每人可以食到 6 個原個榴槤，大約 60 粒果肉。不過以佢所知只得一位男士食到約 50 粒果肉，女士們普遍食咗 10 幾粒果肉後，就開始有飽肚感。戰鬥力不似預期喎！唔緊要！榴槤放題嘅最終目的，其實係想大家認識多啲馬來西亞嘅榴槤品種，等大家唔使一味追貓山王嚟食！唔知邊隻最啱胃口？又唔知點樣分？即刻幫你介紹番！
名種榴槤介紹番
純種老樹（888）（有機！）
正宗馬來西亞榴槤，全有機種植，而且沒經任何嫁接。從來無出口到其他國家，就連當地人都好難食得到原個純種老樹榴槤㗎！
顏色：呈淡黃色
質感：果肉較實，唔太濕潤
味道：清甜，榴槤味淡淡哋，好快於口腔內消散
紅肉（D101）（初抵港！）
同樣是首次出口到香港，每個最重約 2kg。認住榴槤刺又尖又長嘅就係紅肉喇！
顏色：橙紅色
質感：肉質細滑好 creamy
味道：甜度比純種老樹較低，但榴槤味相對較濃，清甜回甘
金包（D13）（貓山王表弟！）
未聽過金包，唔係你見識少，事實上呢種榴槤的確未嚟過香港。佢因為個外表同貓山王有啲相似，所以有「貓山王表弟」之稱。
顏色：果肉呈深黃帶橙
質感：纖維比較少，但入口仍然有奶油感
味道：甜度好過高，榴槤味相對溫和，屬初次品嘗之選；唔想畀奸商用金包扮貓山王？畀多個 tips 你，金包嘅原果呈圓形兼細細粒、果肉光滑無皺紋，記得喇！
蘇丹王（D24）（帶酒香！）
見到熟識嘅面孔喇！D24 又稱做 XO，係高山、山頂生長嘅 D24 品質最好！D24 果殻帶灰，榴槤刺好尖好長，每 4 粒大刺中間會有一粒細刺，好易認！
顏色：淺黃色
質感：雖然比較乾身，但肉質柔軟
味道：甜而不膩、榴槤味濃而不俗而且帶酒香，層次好豐富
老樹貓山王（D197）（熱捧！）
深受香港人熱捧，原果形狀似啤梨，果殻呈灰色，刺短。底部嘅星形紋，其實係透露了榴槤有幾多瓣肉，5 角即係 5 瓣咁解！
顏色：果肉呈金黃色，
質感：肉厚核細，甜度高又好 creamy，有種好似棉花糖般入口即融嘅感覺
味道：榴槤味非常濃郁，但唔會有苦澀味道，食完之後仲會於口腔慢慢回滲榴槤果香，好正！
榴槤放題咁 Happy，大會仲請到夏蕙 BB 一齊食。佢食咗 15 粒已經嗌飽！
溫馨提示：
榴槤比較燥熱，食榴槤嘅同時最好唔好飲酒。如果怕熱氣，可以用榴槤殻裝水再加啲鹽嚟飲。又或者食幾粒「果后」山竹中和吓啦！
係咪好羡慕我呢？嚟緊 9 月 10 日及 11 日仲會有多 6 場榴槤放題，但反應熱烈所有場次火速爆咗！好彩好彩，老闆決定於 9 月 10 及 11 日加開兩場 9pm-11pm 夜場，8 月 5 日於網上正式開賣！老闆仲會送榴槤放題位畀 UFOOD 的讀者（有興趣讀者密切留意 UFOOD 公布）！大家唔使食葡萄喇！YEAH！
食唔到放題都唔好失望，可以搵榴槤 BB 訂馬來西亞貓山王！榴槤於網上訂購，每逢星期六中午 12 點截單。然後直接向馬來西亞果園取貨，星期二就會空運到港再直接送到府上，既方便又快趣。
文：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
