店主 Johnson 本身開日本餐廳，因喜歡食拉麵而開店，有次到橫濱，居然發現當地一間拉麵名店亦有煙燻叉燒，試過後大為欣賞，便着手搞香港第一間做 smoked Cha-Shao 的拉麵店。
驟眼看似西式蜜糖火腿，鹿兒島黑豚肉眼經慢烤及煙燻後，色澤的確誘人，切成片片叉燒，煙燻香撲鼻，鬆軟香甜。
破格位除咗處理法，叉燒常用的豬腩豬肩，統統 out 出局，換上矜貴點的鹿兒島黑豚肉眼位。「肉眼鬆軟嫩滑，但無豬腩咁肥，同煙燻味亦夾。」Johnson 解釋。做煙燻叉燒都幾複雜，肉眼每份裁好定形，約重 1 公斤，用沖繩海鹽醃味後，放入雪櫃熟成 3 日，令肉質更鬆軟。進煙燻焗爐以低溫 80 ℃ 慢焗 4 個鐘至 9 成熟。今天焗好的叉燒，第二日才拿去煙燻 30 分鐘，分段做，因為燻香味即日煙才 keep 到。煙燻用的是櫻花木，木味淡淡的，唔會太霸道蓋過晒肉眼原味。叉燒還會長期放在熱爐下保溫，臨煮拉麵時才即切，保存肉汁。
肉眼叉燒經醃味、熟成步驟後，會進煙燻焗爐以低溫慢焗 4 個鐘，第二天會再煙燻 30 分鐘入味。
這店用的是豬骨湯，熬足 12 小時而成，可選豬骨湯或味噌；麵條由本地廠用日本麵粉生產，為曲麵，彈牙兼掛湯汁，這裏特意揀少鹼水的。拉麵煮好，師傅會加點雞油，增加香味，再放煙燻叉燒、菠菜及紫菜等配菜。
豚肉拉麵 $98、半熟玉子 $14 豬骨湯配搭叉燒、菠菜及 3 片紫菜，食得滿足，想要滑溜口感不妨揀直麵。
味噌拉麵 $108、筍 $12 味噌湯底以豬骨湯混合濃郁的赤味噌及調味料，帶鹹甜辣味，曲麵條彈牙，鹼水味淡，煙燻叉燒即使浸湯也好吃。
豚燻拉麵
地址：銅鑼灣謝斐道 468 號百達中心地下 E 舖
電話：5400 6734
營業時間：12nn - 11pm
註：由即日至 8 月 15 日，只要 Like「豚燻拉麵」 Fb，可享拉麵買一送一優惠。
文：Pam
歡迎你 like 我哋 U Food Facebook Page / U Food Instagram ，取得我哋更新更快嘅資訊！
