原來佢係北海道牧場餐廳的全新概念品牌，除貫徹用日本食材做出港式美食外，新餐廳同時加入西式的元素，一次過食勻港、日、西式 3 種滋味。
餐廳的裝修都別具心思，請來本地藝術家以香港牛棚藝術村為靈感，又將香港中環的高樓大廈變成卡通版畫成壁畫，擺明 sell 港式情懷。Menu 上的選擇更加豐富，吉列豬扒配出前一丁、叉燒湯通粉、野菌意大利粉、港式叉燒飯、西多士、漢堡包、甜品藍莓奶凍一應俱全。選擇太多，唔知點揀，可以由港、日、西式的 3 大 signature items 入手。港式的鮮牛肉番茄雜菜湯通粉，牛肉用了新鮮牛，湯底亦用了大量新鮮番茄及雜菜熬成，濃厚不會水汪汪。西式的 HOKO All Day Breakfast 份量十足，烤香腸、煙肉、番茄、茄汁豆、多士排得滿滿，當然不少得招牌的 3.6 牛乳炒蛋，滑嘟嘟的炒蛋面加上黑松露醬，即時 upgrade！日式黑咖喱都有升級版，黑咖喱加入的車打芝士及 Mozzarella 芝士再焗到半融，伴以牛肉漢堡扒及3.6 牛乳炒蛋，好飽足。
甜品不再是一口多士，改成茶餐廳式的大大塊厚身西多士，中間的餡料有香蕉 Nutella 朱古力、蘋果蓉及吉士，每款都配上兩球不同口味的雪糕。嫌西多士太「肥仔」，亦有 4 款甜品杯揀！
HOKO All Day Breakfast $65
All Day Breakfast 不少得餐廳的招牌 3.6 牛乳炒蛋，滑嘟嘟的炒蛋配黑松露醬，即時變得高級！加埋烤香腸、煙肉、番茄、茄汁豆、沙律及厚多士，好豐富。
濃厚芝士黑咖喱漢堡飯 $58
日式黑咖喱加上焗至半融的車打芝士及 Mozzarella，伴以牛肉漢堡扒及招牌 3.6 牛乳炒蛋，非常飽肚！
鮮牛肉番茄雜菜湯通粉伴多士 $48
港式代表番茄牛肉通粉，湯底用了大量番茄及蔬菜熬成，沒茄汁的假甜又濃郁，牛肉更選用新鮮貨，有牛味又無渣。
特濃咖啡伴雪糕 $40
選用 100% 阿拉比卡咖啡豆，由本地烘焙師每日烘焙後直送餐廳。House Blend Espresso 甘甜微酸，淋於雲呢拿雪糕上，剛好平衡咖啡的苦味。
HOKO Farm
地址：灣仔軒尼詩道 8-12 號中港大廈地下 A 及 C 舖
電話：2889 0910
營業時間：星期一至六 7:30am-10pm、星期日及公眾假期 8am-9pm
(原文摘自 U Magazine ISSUE 534)
想睇更多？即上 灣仔 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
