即磅 即燒立食牛扒

「辛安東元祖奶奶雞」港人店主 Kenny，去年到新宿旅行，發現一間勁爆場的連鎖式立食牛扒專門店，牛扒即切即磅即燒，逐克計錢，百幾蚊港幣就可以鋸到扒，消費大眾化，勁多日本人幫襯！於是他靈機一觸，參考店中營運模式及牛扒食法，開了這間兩層高、玩貨櫃倉庫式設計的牛扒屋。

店內採半自助形式，客人先選牛扒及熟度，由店員即切即磅，客人付款後坐低，稍後店員將燒好的鐵板牛扒，端上客人面前。暫時牛扒有 5 款，來自 3 個產地，有 A4 佐賀和牛（西冷 $1.9/ g；肉眼 $1.8/ g）、美國安格斯（西冷及肉眼各 $0.6/ g）及新西蘭牛柳（$0.7/ g），每人最低消費 200g，為起 $120 就鋸到塊美國 7 安士安格斯牛扒，和牛肉眼也只不過 $360，跟平時去超市或凍肉店買件生牛扒相比，價錢差不多。再豐富點，可加 $30 跟餐，連湯、和風沙律及珍珠飯。以中環區來說，叫超值！

牛扒以火山石爐燒，高溫猛火，火力均勻，能在短時間內快速把牛扒表面燒熟，鎖住肉汁，約需 3 至 5 分鐘便燒好。從日本購入的鐵板，用火燒熱過，墊了洋葱，放上燒好的牛扒，牛扒面頭灑上炸香的蒜片，並塗上了手打刁草牛油。鐵板的熱力，一方面將底下的洋蔥香氣逼出來，另一方面令牛油融化於牛扒中，更具油香，又散發蒜香，是日本流行的食法，加上伴菜粟米及露筍，分量也不少。

餐枱放有 4 款自家製醬汁，讓客人蘸牛扒，像雜果黑醋、柚子味噌、忌廉芥末籽醬及日式黃芥辣。個人偏好雜果黑醋及柚子味噌，將前者淋在扒上，發出連環「滋滋」聲，捲起更多暖煙，濃罩誘人的香氣，令牛扒更 juicy；後者柚子的清酸果香，平衡了牛扒的油膩感；配以店內由日本入口的罐裝汽水和咖啡，貫徹和風 style。

那麼，這裡真的跟足日本原著，全程立食嗎？「如果咁做，一定無人嚟啦！所以我放咗高凳，畀人選擇企或坐。我想走大眾化路綫，開舖前，我哋試足全世界牛扒，最後揀咗美國 Angus 同新西蘭牛柳作為店膽，肉質無渣，啱港人口味，價錢又合理，百幾二百蚊就食到飽。至於佐賀牛，係第一炮期間限定，之後會賣吓其他日本產地直送嘅黑豚扒。我哋唔會好似港式牛扒咁，落梳打粉乸鬆啲肉。生牛扒無添加即切，燒嘅時候只加些少岩鹽同黑椒調味。我係屋邨仔出身，好明白普羅大眾市場嘅需要。」日系打扮的店主 Kenny 說。

柯打牛扒 step by step
(1) 客人先揀座位，取出檯上一張印上冧巴的牌，前往廚房前落柯打。
(2) 廚房的凍櫃展示 5 款生牛肉，客人自選款式、分量及生熟度。
(3) 店員把牛肉切件，放在電子磅上磅重。客人到收銀處付款，可回座位等食。
(4) 廚師即燒牛扒，燒好放在鐵板上，隨後由店員奉上給客人。

特別推介：
佐賀 A4 和牛西冷（$1.9/ g，圖中為 $475/ 250g）
和牛滿佈霜降脂紋，油香肉香豐腴，肉質柔軟中不失彈性。女士們柯打 200g 就夠了，否則分量太多就會太油膩。

美國安格斯肉眼套餐（$0.6/ g，圖中為 $168。點餐加 $30，共 $198）
牛味濃，脂肪比例均勻。套餐連湯、沙律及珍珠飯，湯及沙律會不時轉款，訪問當日有南瓜湯，內有粒粒南瓜，很鮮甜。

新西蘭牛柳（半價優惠 $0.35/，圖中為 $105/ 300g，優惠期至 31/8。）
牛柳位較少脂肪，肉味純而 mild。牛魔王梗係柯打五成熟，肉質不韌。炸蒜片幾香口！

Metal Steak
地址：上環歌賦街 41 號地下
電話：2338 2828
營業時間：12nn-12mn
收費：現金及信用卡，不設加一
交通：港鐵上環站 E2 出口
泊車：聚賢居 $22/hr
平均消費：$250

歡迎你 like 我哋 U Food Facebook Page / U Food Instagram ，取得我哋更新更快嘅資訊！