烚蛋 Boiled eggs
烚蛋應該係我哋最成日食到架啦，除咗叫 Boiled egg 之外，仲有細分為 soft-boiled、medium-boiled 以及 hard-boiled。
Soft-boiled 即係煮雞蛋大約 3 分鐘，蛋黃、蛋白都係生生哋；medium-boiled 其實即係溫泉蛋，煮雞蛋大約 5 分鐘左右，蛋白已熟但蛋黃仲未熟，形成溏心蛋嘅狀態(正呀！！)；而 hard-boiled 講緊就係成隻雞蛋都熟晒啦！
煎蛋 Fried egg
茶餐廳最鍾意食嘅煎蛋就一定係太陽蛋/荷包蛋 Sunny-side-up，即只煎一面，蛋白少少熟但蛋黃依然係生嘅，正！
另外再有over-easy、over-medium、over-hard 之分，over-easy 即係翻蛋，見唔到蛋黃，但蛋黃依家係充滿蛋汁嘅；over-medium 就係煮嘅時間再長少少，蛋白比較實在啲；over-hard 就看個名都知，蛋黃、蛋白乜都熟晒！
Ricky 師傅仲教路，原來酒店界煮隻雞蛋都好嚴格，如果廚師們煎蛋有啡色、蛋邊變焦，雞蛋都已經係唔合格架喇！(雖然小編好鍾意食脆脆嘅蛋邊)
炒蛋 Scrambled eggs
酒店自助早餐一定會有嘅嘢，無論聽落、睇落都好易整，不過要整得滑，當中就大有學問！小編成日聽身邊嘅人話，加牛奶就會滑，Ricky 師傅話其實係錯架！！！！牛奶加入炒蛋反而會令蛋變得嚡口，通常只有想成本低啲嘅餐廳先會有牛奶。
最正確嘅方法係，落鮮忌廉，睇吓煮炒蛋要用嘅材料有邊幾樣先！
材料：橄欖油/牛油清1茶匙、2-3隻蛋、30克鮮忌廉、胡椒粉、鹽
奄列 Omelette
奄列應該大家都識叫啦，厚厚嘅蛋包住一啲餡料一齊食，食就食得多，煮......聽落都好似有啲難度！唔洗驚，即刻送上煮奄列嘅零失敗方法。
材料：雞蛋3隻、橄欖油、牛油清 (加強顏色)、自選配料
點煮？
首先打蛋，將蛋黃、蛋白拌勻，然後待平底鑊稍熱，就可以倒入蛋漿，然後用木羹在平底鑊中心打圈拌勻，然後搥幾下平底鑊柄，之後就落自己想要嘅配料，接着翻少少蛋邊(近外鑊邊)，然後由內至外，將蛋完全翻過去(從近自己嘅鑊邊翻向外鑊邊)，再焗數分鐘就可以。
配料其實就視乎你哋鍾意食咩配料啦，大路嘅通常就有蘑菇、蕃茄、洋葱、三文魚。要留意，成功嘅奄列應該有蛋汁，而且呈半月鵝蛋形，咁就 very good 喇！
水煮蛋/波蛋 Poached eggs
呢款雞蛋呢，可能大家會比較少整，但水煮蛋因為egg benedict 嘅出現而漸漸受歡迎。呢款蛋係必學 item，望落好似有啲難度，做落就簡單，easy job，都呃到like架！
材料：醋、鹽、雞蛋
點煮？
將加入一茶匙的醋、鹽的水煲熱，醋能令蛋白變硬身、凝固，待水煲熱至起煙，收細爐火，然後緩慢地用湯匙將預先脫殼的雞蛋放入水中，待蛋白變凝固，用湯匙將雞蛋拿出，放在廚房用紙上吸水，完成！
班尼迪克蛋 Egg Benedict
其實 Egg Benedict 就係 Poached Egg 上面再加 Sauce，所以其實 Egg Benedict 絕對係零失敗，自己整嚟都無難度！
點煮？
完成 Poached egg後，將約一湯匙嘅牛油清放在蛋黃上面，再慢慢推開至雞蛋，然後放入焗爐稍烘焗一下，大約30秒即可。
使用平底鑊 / 易潔鑊時：
- 千萬不能用不銹鋼匙羹，宜用木造嘅匙，或能受熱300度以上嘅器具，以免鑊上膠膜受損
- 清洗時須用軟質海綿布
溫馨提示：
食邊種蛋都好，最重要係洗乾淨雞蛋，不過雞蛋表面都有好多H5N1、沙門氏菌等等，所以一定要洗淨！
嗚謝：Congress Plus、Ricky Chu 師傅
薈景
地址：灣仔港灣道1 號香港會議展覽中心 4 樓
電話：2582-7250
營業時間：星期一至五(公眾假期除外) 12nn-3pm、6:30pm-10pm；星期六至日 6:30pm-10pm
環球美食自助餐
