text│Vera
有「職場女王」之稱、資深獵頭公司 CEO 張慧敏（Son 姐），熱愛下廚，有 50 年入廚經驗，早前更創立自家美食專櫃「SON 級推介」！她嘴刁講究用料，做賀年糕要過得佢把嘴才出得市面。記者吃過她的蘿蔔糕、芋頭糕同椰汁糕，啖啖原材料味道，尤其是芋頭糕，拎上手非常重秤，芋味、臘味味勁濃，是一眾熟客口中「無得輸」的名物！
SON 姐的糕品賣價不便宜，又無華麗包裝，價錢高企皆因落足料，一底 600g 的芋頭糕有 500g 是芋頭，比一般芋頭糕用量多 5 倍，加上用冬天當造夠粉的荔浦芋，比粉芋的芋味更香、更濃郁。她製作芋頭糕好注重細節，芋頭手切成粒，分大小兩種 size，大粒保留口感；細粒在煮製時會融於粉漿中變成芋蓉，蒸糕時芋與粉便能融為一體，全面釋放濃郁的芋頭香味。換上高檔而健康的初榨橄欖油及果榨油炒材料、推芋蓉，比用花生油做，糕身煮好會更加滑、更加細緻。
她堅持用 $200 一斤的泰國蝦米，一半原隻加入、另一半切碎，切碎後爆炒夠香夠透，加入乾葱一齊爆，香上加香。糕內仲有足料的半肥瘦臘腸、膶腸同肥臘肉，夠油份爆炒時就釋出重重的油香同玫瑰露酒香，融合蝦米、荔浦芋所有材料的香味，少用味道霸道的五香粉，這底芋頭糕貴啲都值得畀，因為手工、心機同靚料都有齊晒！
--------------------
將芋頭一半切大粒，保留口感；另一半切細粒，煮時融化成芋蓉，令芋味更香濃。
臘味
落齊膶腸和臘腸，比例各半。臘腸半肥瘦，油香搶鏡，臘味切得超幼細，拌勻在糕裏，臘味味更易滲透出來。
先落油將乾葱頭與蝦米爆香，散發出 double up 的香味。
芋頭本身極索油份，改用果榨油混合初榨橄欖油炒，融成芋蓉可帶出豐厚軟滑的質感。
用整西式蛋糕攪拌粉漿的原理，逐少逐少地落粉漿，攪拌時更均勻，防止凝成「一嚿嚿」，蒸好的糕特別滑溜無顆粒感。
芋頭比例遠遠多過粘米粉及澄麵粉，推出來的芋蓉更加濃滑綿厚。
芋頭糕 $288 盒
芋頭糕切片，每片橫切面看到布滿材料，頗高密度。
芋頭糕
以長方形的膠盒盛載，一來外形似金磚寓意步步高升，二來方便客人切件。
蘿蔔糕 $288 盒、椰汁糕 $188 盒（後）
記者私心推介，蘿蔔糕手切蘿蔔條比例多又非常鮮甜；椰汁糕不落水全用椰汁製作，椰汁味天然鮮活。
【info】
SON 級推介
地址：尖沙咀河內道 18 號 K11 購物藝術館 B2 層 Kiosk 52
電話：9671 3313
營業時間：12nn - 8pm
