AK 哥哥及好友開的拉麵店日暮家‧麵匠登場，開業首日已有大批生粉排隊支持。拉麵店以AK 愛貓做主題，由飲品包裝、拉麵碗，到店內壁畫，都見 AK 貓貓的身影！門外仲擺放 AK 自家品牌的九尾狐 Kyubi 做吉祥物，成為 招牌打卡位。
text│Sakura
提供 5 款拉麵，主打京都風濃厚的豚骨湯及雞白湯拉麵，湯底經超過 5 小時熬製，口感濃厚稠身，麵條則由日本直送，麥味香濃。招牌必試季節限定葡式檸檬蜆貝拉麵，每日限量 30 碗，靈感來自葡式煮蜆，以葡萄牙青酒 Vinho Verde 入饌，再加入自家製檸檬汁、瑤柱水、牛油調味，檸檬清香又有微微酒香。
鍾情雞白湯的，必試日和拉麵（即濃厚醬油雞白湯拉麵），慢火熬煮的雞白湯逼出骨膠原，再配上九州名物華味鳥慢煮雞肉叉燒，整碗水準都不錯！建議加配溏心蛋，上面印有貓爪圖案，勁有心思！小吃和飲品都有驚喜位，如柑橘果凍唐揚炸雞，棄用他他醬改配自家製柑橘果凍；支裝黑豆茶更有 AK 愛貓芝麻的立體掛牌，非常 kawaii！店子小，只設 25 個座位，想食的就要預咗排隊啦！
【info】
日暮家‧麵匠
地址：尖沙咀宜昌街 4 號漢光大廈地下 D 舖
電話：2715 2382
營業時間：12nn - 4pm、6pm - 10pm
季節限定葡式檸檬蜆貝拉麵 $158
每日限量 30 碗，以葡萄牙青酒 Vinho Verde 和檸檬汁、牛油等入饌，湯底清新充滿檸檬香味。
日和拉麵 $98、溏心蛋 $16 隻
雞白湯底非常濃厚，雞肉叉燒由九州名物華味鳥慢煮而成。味玉烙上貓爪圖案，非常可愛。
琥珀拉麵 $113
以新鮮蜆貝熬湯，清新不油膩，將黑松露醬混入湯底吃，散發幽幽黑松露香。
日暮拉麵 $98
豚骨湯熬煮超過 5 小時，濃厚稠身，加上秘製甘味醬油提鮮。
赤雲拉麵 $108
湯底結合豚骨及鮮蝦熬成，再加入日本味噌和櫻花蝦，鹹香鮮甜，配上雲吞，是日本現時流行的食法。
