「神虎拉麵」的本店在大阪，在當地有 5 間分店，香港店老闆是在港日本人，拉麵技術由大阪方面支持，本店更派來主廚木村師傅來打點。舖頭最出色的是湯底，做法比日本方面更講究，湯底比日本熬得更久，足足 12 小時，而且期間的 10 小時裏，需要師傅每隔一段時間就用力攪拌，把湯裏的豬骨、蔬菜與肉都攪溶，令湯料味道盡出。店長說每天最少攪斷一枝木棍，拍攝當日記者親眼目擊攪斷棍一刻。湯底更加入了關西魚介醬，令湯底不止九州拉麵咁簡單。
最特別是店方跟足日本拉麵傳統，會在每碗拉麵裏加入背脂油，舖頭特別從日本運來豬背脂，再在店裏長時間煮再打散，做出一粒粒的油脂，令湯底更甘香且有助保溫，拉麵由開始至吃完，湯底熱度也夠，湯底濃淡得宜有肉香。
配搭 2 款由大阪提供配方，再交由本地日本麵廠製的直身拉麵，麵條滑溜適合配油份重的豬骨湯。另有餃子及叉燒飯，現在中午和黃昏時段門外都有人龍，不過等候時間不過 15 - 20 分鐘，但開業以來，試過 8:30pm 就賣晒湯底，會無麵賣，唔好咁晏嚟。
神虎拉麵 $83
最能吃到豬骨湯的味道，湯味鹹淡適中，有鮮香的肉味，加了一匙豬背油更添甘香。要讚上枱溫度佳，吃完麵還夠熱。
黑虎拉麵 $78
加入了特製的黑蒜油，令豬骨湯添上蒜香。
赤虎拉麵 $78
拉麵加入特製的辣醬，具辛香味，辣味愈吃愈濃。
叉燒飯 $45
拉麵用的叉燒切粒再加上秘製醬汁及用日本蛋製的荷包蛋，弄穿蛋黃撈飯吃。
店內的豬骨湯煲足 12 小時，主廚木村師傅甚至每日攪斷木棍令煲內的骨、蔬菜與肉都融化。
有圖有真相，採訪當日剛好見到師傅攪斷棍一刻。
自家煉的豬背油是拉麵的 magic touch，令湯底鮮香更上一層樓，日本的傳統拉麵店都會加。
叉燒水準不俗，用上豬肩肉製，肉質非常柔軟鬆化，有入口即融效果，而且有肉鮮味。
一般拉麵店格局，座位鬆動坐得舒適。
神虎拉麵
地址：灣仔廈門街 23 號
電話：2808 0635
(原文摘自《U Magazine》文：sieg、圖：Ming)
