蓋上 蛋棉胎
秀殿隱身在銅鑼灣商廈，環境 cosy，盡頭還有個小露台，就像其英文名 Hidden Kitchen。店子自 5 月一開業，就靠香滑奄列飯彈起，食客、Blogger 爭相去食，人氣極盛！
店主小川泰明來自廣島，來港多年一直尋不到家的味道，索性自己開間餐廳，他說：「蛋包飯我由細食到大，個個日本媽咪都識煮，而呢種奄列蛋飯係另一種做法，嚮日本好流行。我唔會切開隻蛋，費事流晒啲蛋汁，但當你一羹舀起蛋同飯放入口，就可以感受到流心的多層次！」
餐廳用日本雞蛋、日本米煮出地道滋味：北海道雞蛋濃味又滑身，每客飯都用上 4 隻，難怪似張厚棉胎；飯則黏黏哋頗煙韌，混合雞肉、青椒、洋葱等做出傳統飯底「茄汁炒飯」，酸咪咪好醒胃。
伴碟的牛肉汁亦是精髓所在，焗香牛骨後，跟蔬果、紅酒等最少熬煮兩日，濃稠入味，一食就知不得了。不嗜牛汁，還可選番茄汁、白汁海鮮，選擇多樣化。
秀殿
地址：銅鑼灣渣甸街 54 號富盛商業大廈 3 樓 D 室
電話：2504 1511
花式 蛋包飯
天后的「生原創蛋包飯」稱得上是本地首間蛋包飯專門店，供應接近 20 款口味，都偏向新派：涼瓜肉碎、墨汁海鮮、海膽、冬蔭功等，蛋皮顏色黃、綠、白、黑都有。客人可選傳統蛋包飯或流心蛋，當中又以後者大受歡迎。
一身潮人打扮的店主華師傅，入行做日本菜多年，自言最叻煮蛋包飯，從前學師就經常煮畀日本師傅食，工多藝熟，開舖也主打此菜大展身手。
煮蛋包飯，人人風格不同，「華師傅 style」是用大隻美國蛋，貪其色水靚，有蛋味；揀手台灣米，質感軟糯黏性好，還用自家製日本醬油汁炒飯，鹹甜香俱備，比傳統的茄汁味富新意，而鰻魚、墨汁海鮮等款式，更用海鮮汁炒飯，增添鮮味。
餐牌裏任何一款蛋包飯，都可加 $18 變流心蛋飯，每客用上 4 隻蛋，試過就知蛋汁澎湃，又香又滑，華師傅話：「煮流心蛋要耐啲，想好食無非用個心，拌勻雞蛋後，我習慣將蛋汁隔一隔渣，等佢再滑啲。」啊，收到！
生原創蛋包飯
地址：天后清風街 3 號地下
電話：2512 1809
蛋包飯 貪新不忘舊
蛋包飯從奄列演變出來，本來就帶點西洋味道，日本不分男女老少都鍾意，屋企媽媽愛煮，出街又有專門店，早已成為日本國食。多年下來，更由傳統的茄汁炒飯款，演變出其他創新口味，連近日 hit 起的流心蛋亦大玩花臣，新歡舊愛都咁正，的確好難揀！
傳統式蛋包飯 $78 （生原創）
炒飯餡料有雞肉、洋葱、蒜粒等，用上茄汁來炒，番茄味香濃，甜甜酸酸，蛋皮薄又滑，包着炒飯好食！（店子會視乎情況而做。）
做蛋漿時可加入忌廉或鮮奶，令蛋皮滑溜溜，華師傅則愛用花奶代替，更滑溜之餘，味道亦較淡，不怕蓋過其他食材。
用牛油開鑊煎蛋皮，份外香噴噴！煎時要不停搖動易潔鑊，令蛋皮煎得均勻透薄。
雞蛋快熟，所以煎蛋皮最緊要快手，約 4 至 5 秒鐘要弄好。
鮮帶子菠菜蛋包飯 $158（生原創）
蛋漿混合鮮菠菜汁，變成清新綠調，炒飯以帶子、洋葱做餡，還用上海鮮汁炒飯，鮮味 double up！配埋 creamy 白汁，極多層次。
Hayashi 牛肉滑蛋包飯 $79（Tamago）
最正係個汁，Hayashi 意即「燉牛肉」，香草雜菜紅酒牛肉等足料熬十個鐘，超濃香！牛肋肉亦煮足幾個鐘，質感軟腍，牛迷必試！
冬蔭公蛋包飯 $128 （生原創）
一上枱即聞到泰式風味，冬蔭公汁以辣椒、香茅、南薑、青檸等炮製，好地道！炒飯內有原隻海中蝦，鮮爽彈牙，伴碟有粒車厘子，食完飯好清清味蕾。
「明白」蛋包飯 $198（生原創）
淨用蛋白炮製，唔驚膽固醇！原條鮮甜的松葉蟹肉，加點洋葱做餡料，外面是明太子醋，平衡味道，食到粒粒明太子，好特別。（須預訂）
野菌燻豚芝士牛肉滑蛋包飯 $79（Tamago）
賣相如中式鴛鴦飯，燒汁、芝士忌廉汁各有滋味，跟滑蛋、自家製煙燻豬肉都夾！
意大利香草車海老滑蛋包飯 $79（Tamago）
像西菜般精美，特別在用香草飯，配以香草汁及蝦，配搭新鮮。食點紅色的福神漬，醒胃清新。
盛八食堂Tamago
地址：銅鑼灣京士頓街 9 號名店坊銅鑼灣店 AEON MaxValu Prime 1 樓 L102 號舖
電話：2805 5711
(原文摘自《U Magazine》文：Pam、圖：Lamlam、Sky、Chow、Suki、Kam、Ken、Jay)
