骨肉相稱 脆香生炒骨
生炒骨同咕嚕肉，好多後生仔都唔識分，因為唔少小炒王一係唔做，一係以「無骨」咕嚕肉當生炒骨賣，甚至把生炒骨炸到乾巴巴，或是入口無肉。大角咀有一間真係做到「有骨有肉」的生炒骨，而且極為揼本，唔似坊間小炒一味用幾乎只得骨的排骨，用的是新鮮腩排，件件生炒骨有肥肉、瘦肉和排骨，肥肉與瘦肉佔 2/3，做出來的生炒骨真正「有肉食」，唔會一味只可以舔骨，加上不是冰鮮貨，吃來才有味 juicy。醬汁跟足古法，用新鮮的山楂出水煮汁，醬汁煮出來是山楂的天然色，加上檸檬汁和醋煮過，三重酸甜香夠天然，坊間用茄醬開出來的難以媲美。加上腩排炸到恰到好處，粉漿貼薄入口不會太厚，鬆化脆口，醬汁包着每粒生炒骨，一食就停唔到口。
生炒骨以外，店子招牌菜還包括用上新鮮三黃雞做的深圳雞煲、用九龍吊片炒的下酒佳品椒鹽炒魷魚絲、黑草羊羊腩煲都是必試的菜式。也不要錯過這裏的海鮮，都是由供應商購入的高檔貨，料靚自然味道好。
晶輝飯店
地址：大角咀角祥街 31A-33 號地下大利樓 39 號舖
電話：2393 1699
由生米炒成熟飯 生炒糯米飯
一入冬，糯米飯周街都係，不過敢講不少食店都是先蒸熟大半，臨尾才埋鑊加老抽兜兩下，扮「生炒」。勢估唔到這間小店卻不計工夫，一個糯米飯照樣要師傅埋爐足 15-20 分鐘生炒，咁有心才賣 50 多元！
生炒同半蒸半炒糯米飯的最大唔同，一字記之曰：「爽」！糯米沒接觸過水氣，水份自然少，口感才不會「立」和黏成一舊。這裏的糯米飯秘技就係做得認真，真正由生炒到熟。想 skip 蒸的步驟，竅門係糯米要浸得透，米浸足 12 小時，米身變腍，連米水落鑊再炒 5 分鐘已經熟了近半。緊接就係點樣炒得爽口，勁就勁在師傅用油量極少，出動麒麟臂不斷猛火兜炒，令油份平均包裹每粒飯粒和臘味粒，這樣糯米就不會黐在一起，而且粒粒企身又煙韌。
這店以鑊氣馳名，推介大家試埋秘製「皇帝雞」，其實是富貴雞的平民版，極具創意的師傅用錫紙加上焗爐代替富貴雞所用的泥窯，用上新鮮清遠走地雞、大量新鮮的沙薑及紅棗焗，雞肉入口勁多肉汁，而且吸晒沙薑味，好味爆燈！另外，石鍋菜如梅菜扣肉煲、話梅豬手煲、啫啫蝦醬芥蘭等，熱辣香口。
田苑珍姐美食餐廳
地址：大角咀福澤街 22-26 號地舖
電話：2396 8148
四重工夫 樟茶鴨
樟茶鴨向來只在高檔中菜館出現，原因不外乎它要又醃、風乾、蒸及炸，每碟小炒才賺你十多塊錢，師傅才沒有這種閒情！這間隱藏在大角咀一個不起眼角落的「茶記」，卻賣這上菜，店內還有不少「麻煩菜」，如流沙賽螃蟹、水煮豬三寶、燒汁豬仔髀、趣怪雞……平凡小店都有驚喜。
這隻鎮店之寶樟茶鴨，由於烹調時間足足要一日，又要揀啱靚靚米鴨才有得供應，想食記得要訂。做這鴨好煩，單是揀鴨已經有一定要求，鴨不能太肥、太多膏，剛好 2 斤最好，因為細鴨肉才嫩，油份不會蓋過茶香。燻的時候也有技巧，除了用普洱及樟木燻，師傅還把樟木跟乾葱頭、燒油、生粉、鹽及葉子等塞進鴨身醃 4 小時，連料蒸足 2 小時，鴨身裏裏外外有樟木的味道，鴨肉夠鬆夠嫩。鴨吊翻乾個幾鐘後，讓蒸煮時的水份完全流失，味道變濃再淋油炸香，這菜足足 occupied 師傅 十多個小時，真係啖啖工夫。
新華園
地址：大角咀道 251-253 號地下
電話：2392 8381
復刻古早味太爺雞
太爺雞唔係豉油雞，其實是清末官紳周桂生所創作的菜式，其後人在 60 年代更將它引入香港，成了當年名店「大三元酒家」的名菜。茶記格局的大角咀小店也以此雞作招牌，更巴閉到連名作家李碧華都食過。
炮製太爺雞比起豉油雞多幾重工夫，雞要雙重入味。第一重先是用無敵廣東滷水去浸雞，師傅用上南薑、香茅、花椒、八角、桂皮等多達 20 多種新鮮藥材煮滷水，而且每 3、4 日添藥材一次，滷味甚濃，每隻雞用上 35 至 40 分鐘把牠由生浸到熟，同豉油雞唔同，味道較柔和及有鹹鮮味；第二重是用甘蔗渣加上茶葉及糖做煙燻，雞皮顏色比豉油雞來得深，但因為用糖燻過，雞皮較光身也略帶甜味，熱力更將滷水及煙燻的味道迫入骨髓，更加入味。
店子的滷水做得不錯，連帶以口味較清的白滷水浸製的太爺豬手也是必點 item，真係在坊間未吃過如此爽腍及膠質重的滷水豬手，吃完兩道香口菜色後，點個無味精的燉湯，清潤固本！
太爺雞
地址：大角咀中匯街 7-9 號地下
電話：2381 9030
(原文摘自《U Magazine》文： sieg、圖：Kwan、Ray、last、Kee、May、Lamlam)
