星級食家：唔食唔肥
食家簡介：乜都放入口，想減又減唔到，食左先算！
兩年前一局，大家殺聲震天水準倒步得過份，豈料早兩三個月前試試，又覺得水準回升返，就借「為食到新界」個名攪一次，又遠又隔涉，都有十幾人捧場，老板又著意留左幾味菜，食得盡情又盡慶。
可能生意太好，就連旁邊另一舖位亦收歸其下，老實講是乾淨舒服得多，十六人一張大檯亦不覺逼挾。
紅叮先行送上日本手信，再有子陵的棄餐酒轉飯後果，實在有點驚喜。
水瓜煮魚鰾：砂爆魚鰾往往帶有海沙，但鹽爆魚鰾爽口之餘多了一朕海水的咸香味，再吸收肉碎湯的鮮甜，水瓜清新鮮嫩，一年四季都能供應，可以說是每次必叫菜色。
客家梅菜扣肉：雖不至於大榮華級數，但圍村人煮自家菜，有一定水準，五層肉分明，脂肪位入口軟糯，梅菜吸收了肉汁及甜豉油的精華，芳香撲鼻，用作送飯一流。
魚腐菜心苗：魚腐可以話一般，魚味太輕，就算用上濃魚湯亦救不了多少，可能是貨源的問題，菜苗亦欠缺鮮甜味。
客家咸鮮草鵝：第一次試，可以話有驚喜，咸香的鵝肉嫩滑，完全無常犯肉質死實的毛病，而且帶有少許羶味，同咸雞是兩種不同風格。
炸墨魚棗：其實另有一種蝦棗，但是日只得墨魚棗獨挑大樑，墨棗新鮮熱辣炸起，入口彈牙又充滿墨魚的味道，再簡簡單單蘸點甜酸汁就加好。
紅蔥生爆吊桶：新鮮吊桶用紅蔥頭，蔥段及洋蔥幾款香口蔬菜快炒，時間掌握得好，魷魚剛剛熟，墨汁將魷魚包裹，墨汁的鮮甜味將外表缺點蓋過，再加上洋蔥等香味，用作送酒一流。
炒魚麵：魚麵可說是此店名菜之一，用上大量洋蔥絲，冬菇絲，蔥段及西芹絲同炒，香口又彈牙，同平常食到軟綿綿的感覺是兩回事，再蘸點辣油更加正。
薑汁米酒煮豬腰：要預訂的其中一味菜，先後要左兩碟，先上一碟米酒味比較輕柔，薑汁味亦唔突出，反而第二碟就好得多，豬腰更係啱啱熟，略帶姻紅，而'壓'味亦去得幾清，店方處理這類型菜確實是別有一手。
沙薑焗豬粉腸：好正，沙薑味完全沁入粉腸之內，軟糯的粉腸帶少許柔韌，香口又好味。
蕃茄豆卜煮雜魚：師傅以往曾選用'懞仔魚"，不過試過兩次都明顯好"腥"，今次改用雜海魚又好好多，唔'腥'之餘，仲要魚湯鮮甜，又有蕃茄的微酸。開胃又好味。
黃酒煮雞(炒)(一隻)：高水準菜之一， 雞件充滿紅棗及黃酒的甜味，明顯地唔係用砂糖夾硬逼入去，而係將前者的甜味用慢火逐少比雞肉吸收，所以就連雞骨都有味。其實仲有另一種煮法係放湯，不過個人而言都係認為生炒會更惹味。。
招牌菜~~~走地雞：香港有走地雞供應店舖不多，此店是其中一間，整隻雞半點肥油都沒有，雞味濃郁，不用蘸點薑蓉汁亦擦覺肉味與冰鮮貨是兩碼子的事，而且雖然件頭細，但確值得試試。
煎蠔餅：有人話未上檯都已經聞到蛋香同蠔的鮮味，蛋身比較厚，而且結實，不過蠔仔汁液充盈，蛋味未至於將蠔味蓋過，加上油份又少，可以說是比不少潮州檔好得多。
苦瓜煲隔山：所謂隔山，即係豬的橫隔膜，其實是羶味極重的部位，要處理得好是一點不易，用來作菜是比較少見，入口有點爽口，羶味亦去得清，未食過不妨試試。
煎九棍魚餅：單一魚肉，並無加入其他雜魚，肉質彈牙，魚味鮮濃，但與另一味墨魚餅比是兩種截然不同的口感。
豬肉丸津白 ：肉粒比較細少，豬肉食得出新鮮貨，津白本身帶有蔬菜的甜味，再加上豬肉丸放濃湯，而津白炆得夠淋，已經好好食。
手撕雞：比較失色的菜，但都有可取地方，奇怪地雞皮係爽脆，雞肉就比較粗糙，都係走地雞好得多。
煎墨魚餅：同樣的墨魚肉，今次改用煎餅上，感覺上肉味輕得多，而且之前食過墨魚棗，兩者太似，而且相比之下，墨魚味的確是輕柔得多。
砵仔飯：當然無得同大榮華比，人地用上燒豬油，單憑想像都猜測到有幾香口，不過砵仔豬油撈飯始終都係好少地方有得食，再加上新漢記有不少菜都令人想到要一碗白飯。
前後有二十個菜，加上fraz 兄同james 兄靚酒， 又一個開心晚上，埋單一人$160有找，所以有時食飯何必下下要貴要豪華！
推介菜式：水瓜煮魚鰾、炸墨魚棗、紅蔥生爆吊桶、炒魚麵、黃酒煮雞、沙薑焗豬粉腸
用餐日期：2010年10月09日
食家評分：
味道****
服務****
環境****
價錢*****
新漢記飯店
地址：粉嶺聯和墟聯和道 5號
電話：2683 0000
