好食的粉仔應該係咁嘅……
湯底：雖然每家店都有自己配方，但客觀上，湯要有配料的味道，通常都是大地魚、蝦米等鮮味及豬油渣的甘香，不能太淡不，也不能過鹹；質感稠身。
狗仔粉：咬落唔會鬆泡泡，軟腍得來唔糊口，煮得透身之餘要吸到湯味。
配料：通常會有冬菇、豬油渣等，令碗粉夠菇香及有油香，豬油渣要香脆，不油膉。
菜脯：一般食狗仔粉都伴有辣味菜脯，夠香夠辣可加添惹味，同時要有爽脆感，但亦不能太鹹。
5 種辣度選擇 寶琳粉仔 10 分
我以為旺區先有狗仔粉賣，其實好多屋邨或舊區都有！好似寶琳街市，裏面就有檔口賣粉仔，好受街坊歡迎。粉仔湯底偏淡，層次唔夠豐富；粉仔食落唔太腍，勝在豬油渣炸得香脆，無豬臊味。菜脯夠辣，但味道單調；狗仔粉仲有 BB 辣至特辣 5 種辣度，迎合唔同人口味。外賣時豬油渣、花生、菜脯等配料用膠袋分開載，唔怕浸腍，細心！
狗仔粉 $15
很足料，有齊冬菇、花生、豬油渣、辣菜脯等。
主打外賣客，用膠袋分開盛載配料，夠細心。
以屋邨街坊客為主，但食物都做得唔馬虎。
狗仔粉分 BB 辣至特辣 5 種程度。
| 評分 湯底：★★ 狗仔粉：★★ 配料：★★★★ 菜脯：★★ 總分︰10 分 |
寶琳粉仔
地址：將軍澳寶琳邨寶琳街市 PL86 號舖
電話：9650 7563
營業時間：星期二至日 4:30pm-12am
70 年代口味 柒拾后 13 分
老闆係藝員駱卓華，與拍檔阿 John 同樣懷念七十年代的人情味，更懷念以前的滷水小食、碗仔翅、豬油渣麵，開設「柒拾后」賣本土地道小食。其中豬油渣粉仔標榜懷舊風味。湯底比較稀身，唔算太濃太鹹，但層次不足，但狗仔粉勝在咬落軟腍適中。最大亮點係豬油渣，真係炸得好香脆，放湯浸腍一陣都仲係脆，自家製菜脯辣味夠，咬落爽脆，整體來說出色！
豬油渣粉仔 $10
用自家鮮炸豬油渣，咬落好香脆，菜脯都係自家製，極有誠意。
小店設計及餐牌都有心思，好有 70 年代 feel。
| 評分 湯底：★★ 狗仔粉：★★★ 配料：★★★★ 菜脯：★★★★ 總分︰13 分 |
柒拾后
地址：天水圍天靖街 3 號天盛商場地下天盛街市 CF11 號舖
電話：從缺
營業時間：9am-2am
菜脯加分 旺仔婆狗仔粉 12 分
打正旗號賣狗仔粉的「旺仔婆狗仔粉」，有大、細碗兩種分量選擇，湯底用冬菇、蝦仁、豬油渣等配料熬製，但味道唔太香。狗仔粉用粘米製，比較腍身；配料有大塊冬菇，成碗粉都有菇香，另外自家製菜脯有辣與唔辣選擇，口感爽脆。美中不足反而係豬油渣，好細粒之餘仲得幾粒。
狗仔粉 細碗 $20、大碗 $27
係店內皇牌，粉仔、湯料、湯底及菜脯都夠足料，但豬油渣略完全唔夠喉。
冬菇大大片，令整碗粉仔充滿菇香。
自家製原味及辣味菜脯，個人認為辣味好食啲，香辣得來不嗆喉，夠爽脆。
廟街要食狗仔粉，多數人去呢間打正旗號嘅狗仔粉店，位置方便。
| 評分 湯底：★★★ 狗仔粉：★★★ 湯料：★★ 菜脯：★★★★ 總分︰12 分 |
旺仔婆狗仔粉
地址：油麻地廟街36號永星大廈地舖
電話：5403 7117
營業時間：24小時營業
名氣最強 十八座狗仔粉 15 分
要食狗仔粉，最多人認識嘅就係曾獲米芝蓮街頭小食推介、兼分店最多嘅「十八座狗仔粉」。狗仔粉湯底有啲起糊，較為杰身，但味道偏鹹。狗仔粉爽滑得來偏腍，感覺係舊時嘅味道。菜脯、葱及香菇用料分量適中，可惜豬油渣分量卻很少，食落仲有點油膩。最讚係可任添原味及辣味菜脯，有咬口又香辣，夠惹味。
狗仔粉 細碗 $20、大碗 $27
湯底偏鹹起糊，係舊時味道。
豬油渣分量偏少。
店內原味及辣味菜脯任加。
想食狗仔粉最方便，分店最多。
| 評分 湯底：★★★ 狗仔粉：★★★★ 湯料：★★★ 菜脯：★★★★★ 總分︰15 分 |
十八座狗仔粉
地址：深水埗福榮街 88 號地舖
電話：從缺
營業時間：12pm-12am
總結：十八座狗仔粉 勝！
賣懷舊狗仔的小店愈來愈多，但幾家比拼的小店中，仍以首先帶番起潮流的「十八座狗仔粉」水準最高。湯底稠，粉仔軟腍，吸收到湯底味道，兩者都做到舊時風味。各種配料分量剛剛好，如果豬油渣分量多番啲，會更高分。
文：Celia、攝：Celia、Paul
歡迎你 like 我哋 U Food Facebook Page / U Food Instagram ，取得我哋更新更快嘅資訊！
