Via Tokyo 係抹茶甜品專家，兩位日籍老闆見香港除咗某間日本老字號外，可以品嘗正宗京都抹茶美食嘅地方唔多，於是決定在尖沙咀店推出全新下午茶，整個靈感來自日本表參道 cafe 出品，有招牌軟雪糕有蛋糕有蕨餅，仲有回甘抹茶飲，最大亮點只係 $78！
Omotesando Tea Sets $78
簡單精緻，有招牌軟雪糕、蕨餅、蛋糕和抹茶，當中不少甜品都用京都宇治抹茶粉製作，用料一貫咁認真。
下午茶叫「Omotesando Tea Sets」，主角當然係抹茶及焙茶雪糕，可以選擇抹茶味、焙茶味或扭紋味道。食過就知，雪糕用北海道 3.6 牛奶雪糕製作，奶味香濃又夠滑，如果想食濃郁茶味，抹茶味係首選，但如果怕咖啡因就揀經過烘焙的焙茶味，口感同樣 creamy！
焙茶 x 抹茶扭紋軟雪糕，質感幼滑，同時食到奶香同茶香。
Tea set 中另一小編力推嘅係蕨餅，要知道坊間好多蕨餅會混合芋、馬鈴薯粉等製成，口感差一截；這裏吃到的全部由京都入口，以上盛蕨粉製作，老闆指 1kg 蕨才造出 70g 蕨粉，成本高但口感 chewy，拌黑糖漿和黃豆粉吃，清清甜甜涼浸浸，食完雪糕可清清味蕾。
京都蕨餅用 100% 蕨粉製作，食落軟腍中帶點煙韌，加上黃豆粉及黑糖漿，蜜香滿瀉。
吃下午茶點少得蛋糕？這裏做的是 poundcake，自家製作，質感厚實帶濕潤，香味特別濃厚，同樣可以揀抹茶或焙茶口味。我揀咗抹茶，見到深綠顏色就可以想像到茶味有幾濃郁啦！食完呷一口京都宇治煎茶（Sencha），清、淡過後茶味徐徐滲出，送來一口回甘，閉上眼真係以為自己去咗日本！
抹茶蛋糕屬自家製，如一般 poundcake 般鬆軟得來實在，抹茶味很濃，甜度適中；沾上日本鮮忌廉，好香呀！
京都宇治煎茶，味道淡雅，回味細嗒下，甘甜味才慢慢滲出來。
【相關報導】
【同場加映】
除咗雪糕，Via Tokyo 另一樣排長龍甜品就係沙冰，為趁萬聖節熱鬧，由即日起到 10 月 31 日，舖頭推出咗限定「南瓜沙冰」，沙冰用日本空運天然水製作，混合自家製甜奶醬，味道好清甜，沙冰還鋪上足料日本南瓜蓉，南瓜肉落足心機煲煮，加入呍呢嗱油及牛奶煮製，入口柔滑，南瓜味好突出，值得試！
南瓜沙冰 $75（推廣期至 10 月 31 日）
萬聖節限定，用新鮮日本南瓜蓉炮製，香、甜、軟、腍、滑！
Omotesando Tea Sets
供應日期及時間：星期一至五 12pm-6pm
收費：$78
註：只限尖沙咀店供應
Via Tokyo
地址：尖沙咀金馬倫道 29 號 A 地舖
電話：2385 6388
營業時間：12pm-11pm
文：Celia 攝：Chow
歡迎你 like 我哋 U Food Facebook Page / U Food Instagram ，取得我哋更新更快嘅資訊！
【相關報導】
