香港人一向鍾意泰菜，所以喺香港嘅泰菜館，有地道庶民，也不乏高檔次過江龍。曾經連續 10 年獲老牌名流生活及飲食雜誌《Thai Tatler》讀者票選為「泰國最佳食府」的 Nara，旗下主打泰式住家菜的 Apinara 最近登陸咗香港；位於金鐘太古廣場，以泰式住家菜做 selling point。餐廳屬得獎品牌 Nara 旗下，於 2004 年開業至今於曼谷已有 4 間分店。裝潢以金色及黑色作主調，營造泰國古老宅邸的氣派，warm 等嚟又有時尚的感覺。
烤泰式東北豬肉丸 $98
以為餐廳開喺金鐘，食物就一定是貴到嚇親？點知打開個 menu，惹味香口嘅「烤泰式東北豬肉丸」、香港獨有菜式「大蝦炒木瓜絲」都是百幾蚊；金鐘區、過江龍、名牌……不貴了。
泰式刨冰 $68
最吸引我的是泰式刨冰，$68 就食到，抵喇啩！香港店嘅刨冰賣相與泰國店有啲唔同。當地做的刨冰是類似台灣片狀雪花冰，香港店則改成幼粒狀，刨冰有泰式奶茶及泰式紅糖水兩種口味。刨冰底本身無味，但會加入紅糖水製成的糖漿調味，食到中間仲會發現一球呍呢嗱雪糕！
呢一枝就是紅遍泰國的紅糖水，受歡迎程度有如利賓納！當地人會加水及冰就咁飲，味道甜甜哋，最啱用嚟襯刨冰。
柯打刨冰，戲肉就係 topping！原來刨冰會跟埋大樹菠蘿、芋頭、花生、珍多冰、粟米、椰果、海底椰、用紅糖水浸過的馬蹄、糯米、麵包脆粒、紅腰豆及涼粉，共 12 款配料畀你任加！好開心！
將 12 款配料堆晒上刨冰面，原來是好花心機及技巧。一個唔小心，啲配料就好似層層疊咁倒塌，有得食又有得玩。
泰式奶茶刨冰就用咗呢款泰國茶包泡茶，加煉奶製成糖漿，茶味勁香！
Siam Myth $98
餐廳另一邊是酒吧區，用泰國製的 SangSom 及 Mekhong 威士忌調製雞尾酒。呢杯 Siam Myth 就用了伏得加、菠蘿汁、青檸汁、辣椒、香茅調製而成，酸酸哋又帶點辛辣。
最最最最正是，只要於 5:30pm-7pm 嘅 Happy Hour 時段內消費滿 $300，就可以歎 10 分鐘嘅頭肩頸按摩。飲完 Cocktail 再按摩鬆埋個 body，真係好 relax 呀！
Apinara 香港店
地址：金鐘道 88 號太古廣場 2 樓 205 號舖
電話：3107 1888 / 3107 0688
營業時間：12nn-11pm
文：jessie、攝：brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
