天水圍都幾遠，九龍人港島人去附近郊遊完畢，搵嘢食好頭痛！街坊呢，放工返到屋企可能夜已深，想醫肚有難度。最近美食沙漠僵局終於打破！皆因剛開業嘅天盛街市，既係一個新潮街市，裏面仲有立食街！小記即刻視察，發現成條街燈火市通明，環境乾淨，完全唔洗去街市立立亂嘅形象，仲有間香港老風味小食店，最夜開到凌晨兩點，啱晒夜鬼！
天盛街市立食街有成 12 間食店，部分開到深夜，買宵夜唔使愁。
街市翻新後開業，設施全面革新，配套好摩登。
1 平食和牛漢堡 美食主流
有無見過街市有和牛漢堡包食？「美食主流」可能係第一家。老闆鄭小姐本身做安格斯牛及和牛批發，她指公司在澳洲開有農場，供應純種和牛肉，安格斯牛、羊肉等等靚扒。如今轉型開食店，當然用番主打靚扒做小食。小店亮點有 $20 安格斯漢堡，有一塊靚牛扒，食落 juicy，性價比好高。而和牛漢堡，用自家農場純種和牛靚扒製做，好香口，賣 $50，比外面平一大截。另外有自家製雜菜湯，用無激素及荷爾蒙藥餵飼的雞及火雞肉熬製，好足料。
和牛漢堡（$50） 用自家農場純種和牛製作，牛香脂香集一身。
安格斯漢堡（$20），似模似樣，相信只有天水圍小店先食到。
食店本身在澳洲有農場，供應羊肉和牛肉。
美食主流
地址：天水圍天靖街 3 號天盛街市 M419 號店
電話：從缺
營業時間：11am-9pm
2 足料生果甜品 大飯糖
天水圍區內幾乎無甜品店，而家立食街有一間喇！走新派甜品路綫的「大飯糖」，5 年前在洪水橋已有店，鄧達智都讚過佢嘅超級榴槤奶，用 D24 榴槤炮製，好足料。現時進攻立食街，製作依然有誠意，好似「彩虹橋」，用北海道 3.6 牛乳雪糕，加上新鮮生果如呂宋芒、菠羅、火龍果、木瓜、爆珠等炮製，果肉新鮮又夠多。老闆推介的蛋白杏仁茶，用美國原粒杏仁手磨，夠晒香滑，秋冬食啱晒。
彩虹橋（$44）用北海道 3.6 牛乳雪糕，加上新鮮生果炮製，賣相吸引。
蛋白杏仁茶（$34）用美國原粒杏仁手磨，又香又滑。
糖水舖少有立食，但老闆建議堂食，新鮮啲嘛。
大飯糖
地址：天盛街市 M402 號店
電話：2448 0311
營業時間：3:30pm-12:30am
3 惹味新加坡喇沙 榮少喇沙
老闆阿榮係 80 後青年，本身是區內街坊，首次創業，搵到立食街舖位就膽粗粗開店。主打喇沙粉麵，用料講究，喇沙湯底用新加坡來貨的香料熬成，再調校出適合香港人的口味。另一亮點係豬軟骨喇沙粉麵，豬軟骨慢煮 48 小時，因為火候夠，豬軟骨軟腍帶啫喱狀，骨膠源好豐富呀！
豬軟骨喇沙粉麵（$48），豬骨熬足 48 小時，見到現啫喱狀，腍身兼入味。
阿榮想將特色美食帶到天水圍，故開了區內獨有的喇沙店。
榮少喇沙
地址：天盛街市 M411、M413
電話：3427 9226
營業時間：12nn-11pm
4 街市異國風 土耳其風格 AL ZAIQA
土耳其餐廳喺香港很少見，喺天水圍立食街出現，簡直係 amazing！老闆特別聘請一位土耳其廚師主理食物，做出極有家鄉風味的美食。最特別係烤雞肉薄餅，平日食開嘅 pizza 係一大塊圓形，但呢塊 9 吋大嘅 pizza 係船形，好似紙船咁嘅形狀幾得意，而土耳其烤雞又用家鄉香料、胡椒等烤焗，風味十足。
9 吋大船型「烤雞肉薄餅」（$48），造型特別，香料味濃。
土耳其烤雞放上轉動機器慢烤，見到都覺得有異國風情。
食店特意聘請土耳其師傅主理家鄉菜，風味地道。
以後同人講去天水圍食到土耳其美食，咪以為聽錯，係真㗎！
土耳其風格 AL ZAIQA
地址：天盛街市 M409 號店
電話：2177 7966
營業時間：12nn-10pm
5 七十年代人情味小食 柒拾后
老闆係藝員駱卓華，佢同拍檔阿 John 同樣懷念七十年代人情味，兒時在東九龍的屋邨長大，成日見到滷水小食、碗仔翅、豬油渣麵等，乾脆將懷念轉化成現實，開了間「柒拾后」賣本土地道小食。最推介嘅係極品花膠碗仔翅，用真．花膠、魚翅、翅頭、乾翅、魚唇、翅骨等等熬製，真材實料，非冬菇、蝦米、粉絲咁簡單。另外滷水拼盤有豬脷、豬膶、豬耳、豬心、紅腸、八爪魚、生腸 7 款選擇，好足料夠秤，賣 $60 絕對抵食。
滷水拼盤（$60）有豬脷、豬膶、豬耳、豬心、紅腸、八爪魚、生腸共 7 款餸，好足料。
極品花膠碗仔翅（$20）用真．花膠、魚翅、翅頭、乾翅、魚唇、翅骨等熬成，啖啖精華。
豬油渣粉仔（$10），用自家鮮炸豬油渣，咬落好香脆，菜脯都係自家製，極有誠意。
自家製辣味菜脯（$25），好開胃，撈麵食一流！
小店設計及餐牌有心思，真係有 70 年代 feel。
柒拾后
地址：M402 號店
電話：從缺
營業時間：9am-2am
天盛街市及立食街
地址：天水圍天靖街 3 號
營業時間：7am-10pm
文：Celia、攝：Paul
歡迎你 like 我哋 U Food Facebook Page / U Food Instagram ，取得我哋更新更快嘅資訊！
