如果你係旺角地膽，大約都估到我講緊嘅甜品店係「咀妙妙」。呢間小店嘅甜品款式出名多得誇張，附咗中、西式，仲有刨冰、糯米類甜品，當然一啲自創款式最驚喜。
自創以純西米做皮，配搭朱古力做成小丸子，特別！
椰明珠 $33
所謂「椰明珠」，係用西米皮將麥提莎整粒包住，外表就似超大粒西米，放喺凍西米露內，撒上大量朱古力針。西米皮非常煙韌，最讚係加咗西米皮嘅麥提莎沒有變腍，咬落仍然脆口，雙重口感好特別！配上甜度剛好椰汁底，都幾夾！配搭雖然騎騎呢呢，又幾好味喎！
金莎串 $36
呢款甜食串燒，驟眼睇以為係生果 + 糖不甩，原來係新鮮士多啤梨、香蕉配西米！不過今次西米皮包住嘅係金莎！淋上朱古力漿及彩色朱古力針，賣相好繽紛！不過因為金莎本身好大粒，加咗西米皮後 size 幾乎同乒乓波咁大，以竹籤拮住，一咬就散開晒！不過味道都幾過癮！
妙妙（芝麻椰汁西米丸） $35
同類型的自創甜品，丸子外層是煙韌西米皮，不過今次內餡又換咗綠豆蓉及芋頭蓉，配熱椰汁西米露，灑上芝麻，香噴噴。綠豆丸味道唔算太突出，比較清淡；而芋頭丸則有芋頭的甜香味，軟軟糯糯，好啱秋冬天吃。
咀妙妙
地址：旺角豉油街 61 號地下
電話：2783 7033
營業時間：星期一至四：3pm-1:30am，星期五至日及公眾假期：3pm-2:30am
文：Froggie、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
