位於元朗錦田高埔村的天空之城，本來是一眾揸車友的聚腳地。行入幾步，見到呢間走英式風的食店 HOLA，牆身掛上好多英國街景及食物照片，簡約得來幾舒服。
店內最近有款大熱特飲，差不多位位客人都點，就係呢款倒插「HOLA Soda Special」。不同水果與不同口味的水果 mix & match，溝出不同顏色，6 款一列排開，個彩虹色 tone 好吸引。店主 Ivan 話：「之前見到倒插飲品好特別，不如再創新啲，玩埋彩虹色及漸層。推出差不多一個多月，估唔到咁受食客歡迎。」
未飲已經被賣相吸引︰紅色係「西瓜 + 牛奶」，西瓜 soda 倒入牛奶 soda 內，紅與白交雜，慢慢變成粉紅色，一層粉紅又一層白，好少女 feel！藍色係「薄荷 + 柚子」，藍色薄荷 soda 撞柚子蜜，藍加黃，好似回到夏天，味道竟然都唔錯。其餘 4 款都好鬼特別，好想一次過試齊。如果覺得齋飲有啲 dry，可以試埋「大細路漢堡」，size 十足，牛味夠濃。
西瓜 + 牛奶 $48
紅色的西瓜味 soda，雖不是鮮榨果汁，但飲落冇藥水味，倒插在牛奶 soda 上，味道似忌廉溝鮮奶。紅與白溝埋，變成粉紅色，好少女 feel。
香橙 + 茉莉 $48
橙味 soda 配茉莉，味道出奇地夾，淡淡的茉莉花香慢慢在口腔散發。
檸檬 + 青檸 $48
雙檸檬組合，以為會好酸，但酸味剛好，仲有青檸的青新，消滯一流。
青瓜 + 奇異果 $48
青瓜味在口腔超級爆發，加上奇異果的酸甜味，一種夏天的感覺湧上心頭。
薄荷 + 柚子 $48
藍色的薄荷加黃色的柚子蜜，賣相好夏天，啖啖的柚子果肉，感覺好清新。
藍莓 + 菠蘿 $48
紫藍色的藍莓與黃黃哋的菠蘿，果味大爆發，底層仲食到粒粒菠蘿肉。
大細路漢堡 $168
店主 Ivan 話「大細路漢堡」於父親節首推，大漢堡上有個小漢堡，有種父子檔、孖住上的感覺。漢堡扒選用巴西牛肉，食落比美國牛味重，牛味十足，配上大啡菇、煙肉，芝士、番茄等配料，雖然 size 十足，但唔覺滯。
HOLA
地址：元朗錦田高埔村天空之城 16 座地下
電話：5332 2667
營業時間：8am- 10pm
文︰ Theo、攝︰Jay
歡迎你 like 我哋 U Food Facebook Page / U Food Instagram ，取得我哋更新更快嘅資訊！
