香港人真係好愛章魚小丸子！屯門無瓦遮頭嘅「小丸子」，有人願意等足 2 個鐘，真係唔好睇少小丸子嘅吸引力！同樣喺葵廣 2 樓嘅章魚小丸子店「真‧章魚無雙」，可以涼住冷氣食住小食再慢慢等！店內嘅小丸子有 8 款口味選擇，包括大阪風、咖喱、葱、芝士、蜜糖芥末、明太子、蟹籽及黑松露。
章魚小丸子即製，3 位廚師密密手燒，每份小丸子都熱辣辣出晒煙！用料一啲都唔輕手，每粒小丸子都有一隻章魚仔、薑、葱等。咬落唔係會係得粉漿，好足料！
真‧黑松露章魚小丸子 $33/6 粒、$39/8 粒
小丸表子面唧咗用松露醬、松露油、橄欖油及蛋黃醬調製嘅醬汁，黑松露味唔會過濃，另有黑魚籽，增加脆卜卜嘅口感。
真‧芝士小丸子 $28/6 粒、$35/8 粒
芝士小丸子有芝士粉、mozzarella cheese 及芝士片，三重芝味！
超激章魚燒（芝士味） $26
細細粒章魚小丸子成日都見，要呃 like 嘅話就要 order 呢粒重量級章魚小丸子！直徑足足有 8cm 咁高，勁大粒！負責人話，製作重量級章魚小丸子的模具特別由日本訂製，每次只可以做到 6 粒，大約 15 至 20 分鐘先整好一粒，想食真係要畀少少耐性。
芝士味超激章魚燒有芝士粉、mozzarella cheese 及芝士片。
再用火熗將芝士燒至半融，食落仲帶有焦香味。重量級章魚小丸子唔止放咗原隻章魚仔，仲有粟米、芝士、蟹柳、蜆肉及蝦等，食一粒飽晒！
真‧章魚無雙
地址：葵涌廣場 2 樓 C07B 號鋪
電話：9331 7990
營業時間：12:30pm-9pm
文：Jessie 攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
