北海道的蜜瓜雪糕咁出名，除咗因為夠香甜好味，更係因為以半個蜜瓜 / 哈密瓜載住，睇頭十足。近年香港甜品店亦跟風炮製，但感覺完全兩回事。今次御前上茶推出的「義式水果冰淇淋」，就經過精心設計改良，配搭同做法與日本好唔同，既有哈密瓜食，又有香滑軟雪糕；面層堆到成座山嘅波波，係洋菓子。
負責人 Alex 說：「大家覺得洋菓子一定係日本糕點類，其實可以用生果做。我曾經喺外國食過以鮮果做成冰粒的甜品，但口感太硬；今次我哋以做 gelato 方式，用新鮮生果炮製洋菓子，果味重健康之餘，口感更輕盈。」
做成洋菓子外形的 gelato，有芒果、香蕉、哈蜜瓜、紅火龍果及蜜瓜 5 款口味，最特別是紅火龍果及香蕉，食得到火龍果的清甜，顏色又夠搶眼；以為香蕉好普通，質感勁綿密，好得意。Alex 笑住話，因為製作成本太高，呢個甜品每日只能限量供應。「我哋用澳洲哈密瓜，已經有一定成本，加上每粒洋菓子 gelato 都係用新鮮生果做成，現在每日限量 30 至 40 客，賣完就無。」5 款口味 gelato 波波有不同組合選擇，而軟雪糕都有芒果、抹茶、焙茶、豆腐及紫薯味，半個瓜又可揀蜜瓜或哈密瓜，突然選擇困難症發作！
義式水果冰淇淋 $148
可按個人喜好選擇蜜瓜或哈密瓜，同時軟雪糕及洋菓子 gelato 都有 4 種配搭選擇，夠晒貼心。
食完充滿綿密感的洋菓子 gelato，仲有滑滑軟雪糕及新鮮生果，大滿足。
有 4 款洋菓子 gelato 組合選擇，分別是蜜瓜 + 芒果（上左）、哈密瓜 + 芒果（上右）、芒果 + 香蕉（下左）及紅火龍果 + 香蕉（下右），而軟雪糕則有芒果、抹茶、焙茶、豆腐及紫薯味。
御前上茶
地址：廣華街 13 號廣輝大廈地舖 2 號
電話：2448 6738
營業時間：星期一至五 3pm - 11:30pm，星期六及日 2:30pm - 11:30pm
文：Theo、攝：Suki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
