髀賽評分標準
點先叫做好食嘅瑞士汁雞髀？綜合各路嘴刁人士嘅意見，得出以下結論！
1.色澤：第一步係睇外表，雞髀嘅色澤愈深、呈深啡色，代表雞髀滷得夠時間夠入味！除咗睇個膚色之外，雞髀外型要完整、唔好甩頭甩骨、骨肉分離，咁先係一隻睇得嘅雞髀！
2.大細：我諗無人會想食又瘦又細隻嘅雞髀，每次見到瘦骨仙雞髀都忍唔住嘆息，影響埋心情。所以雞髀最好是大大隻、啖啖肉，咁先食得夠爽！
3.味道：單睇膚色深淺都未夠！味道可以細分兩項。首先是雞髀肉，食落唔可以有雪藏味。如果連雞肉都有瑞士汁嘅味道，就為之有水準！另一項是瑞士汁嘅味道，醬汁唔會過甜或淡而無味，又唔會濃到變苦。
4.肉質：雞髀滷煮需時，好多時時間或火候掌握得唔好都會令雞肉變嚡變乾！一隻出色嘅雞髀，要肉質嫩滑、咬落無渣有肉汁。
5.價錢：平平平！愈平愈好！
清楚晒今次 battle 嘅評分標準，髀賽正式開始！
1. 瑞士雞髀專門店 祥發 20 分！
自稱「瑞士雞髀專門店」，於銅鑼灣舊舖已經儲落一大班粉絲，搬到北角舖都仲有大把粉絲嚟食雞髀，又有新粉絲加入！店內每個客人都嗌瑞士汁雞髀，打開個餐牌仲有個「不可不試瑞士餐」，可見呢度瑞士汁髀係幾咁受歡迎，店主對隻髀幾有信心！
色澤：****（5 分為標準）
雞髀呈深啡色，是今次 battle 膚色最深嘅選手，單睇賣相就覺得隻髀好入味！雞髀外型完整，唯獨雞皮稍為破開，不過未去到甩皮甩骨，可以接受。
大細：***
雞髀約 6.5 吋長，論長度，佢嘅成績不過不失。不過雞髀外形比賽瘦削，是今次battle 入面最細隻嘅選手。加上小記獲得一隻比較瘦嘅雞髀，望落更加無肉食嘅感覺。好在老闆見雞髀比平時細，搭多隻雞翼，填補心靈空虛，合格啦！
味道：****
瑞士汁比較黏稠，味道濃郁而不苦澀，甜度是眾店最低，很落唔會有飽滯之感！雞皮被瑞士汁滷透變成深啡，皮薄無乜肥膏。雞肉滷得入味，食時可以再蘸瑞士汁，味道濃到不得了！
肉質：*****
肉質嫩滑，而且煮得夠腍。切開雞髀時有肉汁滲出，雞肉咬落唔乾唔嚡。
價錢：****
呢度嘅瑞士餐，選擇多到爆。瑞士雞髀 / 雞翼或炸雞翼之外，仲可以加配小食、麵、迷你版意粉、炒飯及甜品。最基本嘅雞髀加小食及熱飲盛惠$32，最貴嘅都係 $41，抵啦！
祥發茶餐小廚
地址：北角七姊妹道 27D 號地舖
電話：2891 8547
營業時間：8am-9:30pm（逢星期日休息）
2. 日賣 200 隻！ 樓下冰室 17 分！
荃灣出名小食多，掃極都掃唔完。喺路德圍嘅樓下冰室，裝修走懷舊路綫。瑞士雞髀是冰室名物，幾乎每枱都有一隻。老闆話平均每日賣出至少 200 隻雞髀，好勁呀！
色澤：*****
雞皮滷得深啡色，估計雞髀應該幾入味，雞髀及雞皮賣相完整，雞皮仲泛起油光，好吸引！
大細：***
雞髀約 6 吋長，眾髀之中最短小，不過雞髀脹卜卜咁，好好肉地，分量十足！
味道：****
聞說瑞士汁用咗李錦記頭抽豉油，再加八角、桂皮等多種香料調校而成，糖度適中又有少少香料味，層次豐富。雞髀近骨嘅位置略為𠝹開，令雞肉更易吸收瑞士汁嘅味道。
肉質：***
雞髀中心嘅肉質好嫩滑，肉汁豐富。不過雞髀側邊嘅肉比較乾身，有啲硬，係唯一嘅扣分位。
價錢：**
雞髀單點$28，下午茶時段配埋薯角或沙律連飲品就要 $37。
樓下冰室
地址：荃灣路德圍 14-18 號 B 舖
電話：3565 4599
營業時間：11am-12mn
3. 8 吋加大碼雞髀 瑞士咖啡室 14 分！
最後一位出場嘅選手，係於全港有 9 間分店嘅瑞士咖啡室。睇個餐廳名就知佢以瑞士汁做生招牌，用嚟炒牛河、浸雞髀雞翼都好受街坊歡迎，試吓佢有幾真材實料！
色澤：**
雞髀顏色唔算深色，是最淺色嘅選手，雞皮有啲乾身、唔夠濕潤。不過雞髀外型完好無缺，雞皮無穿無爛。
大細：*****
勁大隻，全髀長約 8 吋！唔止長過其他選手，雞髀都好厚肉好大隻，望落脹卜卜咁，睇見就想咬！
味道：**
睇顏色都估雞髀未必夠入味，果不出所料，雞皮都叫有瑞士汁味，但雞肉白雪雪咁無乜味，好在又未至於食到有雪味！雞髀上枱無乜瑞士汁浸住，想蘸啲汁補補個味都唔得！
肉質：**
雖然切開無乜肉汁流出，咬落肉汁唔多，但肉質尚算滑，唔算嚡口。
價錢：***
下午茶時段，雞髀配薯條、沙律或奄列，盛惠 $31，如果配一口西多士就要 $34；價錢中等，唔算好貴。
瑞士咖啡室
地址：葵涌和宜合道 26-30 號和宜商場地下 B-C 舖
電話：2104 7470
營業時間：7am-10:30pm
髀賽結果：祥發 勝！
食咗 3 間城中瑞士汁雞髀名店，其實入得圍嘅雞髀都是水準之作。不過講得係 battle，點都要揀間最好食嘅！小記就揀咗北角祥發茶餐小廚做 No.1，瑞士汁香濃得嚟又無苦味，甜度恰到好處！上枱時仲有瑞士汁浸住隻髀，想食濃味啲再蘸滿汁就得！雞皮無多餘嘅脂肪，食落唔會成口油，食晒成隻髀嘅皮都無罪惡感！係，雞髀係比較細隻，但勝在肉嫩滑多汁。而且老闆見雞髀 size 細會加多隻雞翼補數，有誠意有良心！今次髀賽，你贏！
文：Jessie、攝：Jay、Nova
歡迎你 like 我哋 U Food Facebook Page / U Food Instagram ，取得我哋更新更快嘅資訊！
