泰國 vs. 馬來西亞
市面上最常見的是泰國榴槤，大家一定食過唔少泰國金枕頭。不過近年榴槤控愈來愈嘴刁，轉投另一盛產榴槤大國－馬來西亞嘅懷抱！究竟泰國及馬來西亞兩地嘅榴槤有乜分別？
Size：單睇 size 都可以估到個榴槤嚟自邊個國家。泰國榴槤嘅 size 比馬來西亞榴槤大，泰國榴槤可重達 6-7kg，但馬來西亞出產嘅榴槤最多只有 3kg 左右。
榴槤柄：都係睇個樣！今次教大家睇吓個榴槤柄就知佢係出自咩國家，仲要睇穿佢係咪樹上熟榴槤。泰國果農會於榴槤約 7 成熟時，提早收割然後再催熟。由於果農用刀收割，所以榴槤柄會有好整齊嘅切口。而馬來西亞榴槤則是樹上熟再自然跌落地，榴槤柄會呈不規則嘅切口。
題外話：點解要食樹上熟？
天然樹上熟嘅榴槤生長期軟長，令果肉嘅味道更香更濃，質地幼滑 creamy。榴槤 BB 老闆 KK 表示，曾經有人試過將馬拉榴槤於 7 成熟時收割再人工催熟，但結果榴槤「熟」咗但果肉變成「生番薯」又硬又乾嘅質感。
馬拉榴槤品種逐款睇
馬來西亞榴槤接近 1,000 種，D24、D13、D101、紅蝦、黑刺、奶油包，似股票 number 又似跑馬仔啲名咁搞鬼。想知邊款最啱你口味，即刻介紹番！
(左起)老樹貓山王（D197）、蘇丹王（D24）、金包（D13）、紅肉（D101）、純種老樹（888）
純種老樹（888）（有機！）
正宗馬來西亞榴槤，全有機種植，而且沒經任何嫁接。從來無出口到其他國家，就連當地人都好難食得到原個純種老樹榴槤㗎！
顏色：呈淡黃色
質感：果肉較實，唔太濕潤
味道：清甜，榴槤味淡淡哋，好快於口腔內消散
紅肉（D101）（初抵港！）
同樣是首次出口到香港，每個最重約 2kg。認住榴槤刺又尖又長嘅就係紅肉喇！
顏色：橙紅色
質感：肉質細滑好 creamy
味道：甜度比純種老樹較低，但榴槤味相對較濃，清甜回甘
金包（D13）（貓山王表弟！）
未聽過金包，唔係你見識少，事實上呢種榴槤的確未嚟過香港。佢因為個外表同貓山王有啲相似，所以有「貓山王表弟」之稱。
顏色：果肉呈深黃帶橙
質感：纖維比較少，但入口仍然有奶油感
味道：甜度好過高，榴槤味相對溫和，屬初次品嘗之選；唔想畀奸商用金包扮貓山王？畀多個 tips 你，金包嘅原果呈圓形兼細細粒、果肉光滑無皺紋，記得喇！
蘇丹王（D24）（帶酒香！）
見到熟識嘅面孔喇！D24 又稱做 XO，係高山、山頂生長嘅 D24 品質最好！D24 果殻帶灰，榴槤刺好尖好長，每 4 粒大刺中間會有一粒細刺，好易認！
顏色：淺黃色
質感：雖然比較乾身，但肉質柔軟
味道：甜而不膩、榴槤味濃而不俗而且帶酒香，層次好豐富
老樹貓山王（D197）（熱捧！）
深受香港人熱捧，原果形狀似啤梨，果殻呈灰色且不會變黃、刺短。底部嘅星形紋，其實係透露了榴槤有幾多瓣肉，5 角即係 5 瓣咁解！
顏色：果肉呈金黃色，
質感：肉厚核細，甜度高又好 creamy，有種好似棉花糖般入口即融嘅感覺
味道：榴槤味非常濃郁，但唔會有苦澀味道，食完之後仲會於口腔慢慢回滲榴槤果香，好正！
葫蘆
於香港好少見到呢個品種，佢於 1987 及 1988 年檳城榴槤大賽中拎過獎，更加是當地榴槤控至愛品種嘅頭三甲！原果嘅外形長身，似足葫蘆，刺又尖又長。
顏色：呈淡黃色
質感：厚實且綿密，果肉雖然略為乾身但又帶黏性，無渣無筋
味道：味道較為偏苦，帶點朱古力味，食完帶有少許回甘
紅蝦
於馬來西亞被稱為榴槤極品，原果外型比較圓，size細細粒，刺短而且又短又密。
顏色：色澤比較深，黃中帶紅
質感：肉質軟綿，有種入口即融化嘅感覺
味道：果肉味s道苦中帶甜，味道濃郁帶回甘。
奶油包
榴槤原果比較細小，一般只有 1.5kg。果殻呈綠色，而且外形略呈圓形，刺大而且長就係奶油包！
顏色：淡黃色
質感：入口香軟，果肉纖維較多，食落非常creamy。
味道：苦中帶甜
文：Jessie 攝：Ray、部分相片由「榴槤BB」提供
歡迎你 like 我哋 U Food Facebook Page (https://www.facebook.com/ufoodfans) / U Food Instagram (https://instagram.com/ufoodhk) ，取得我哋更新更快嘅資訊！
