當中人氣最盛、長期被食客合法佔據的有呢間食堂。空穴來風都不會無原因，何況係個吧枱都坐滿人呢？全城圍住呢張刺身吧枱，為嘅咪就係東京嚟嘅肥美吞拿魚囉。
呢間丼飯食堂，背後有大靠山，它是台灣大型水產公司築地中島水產旗下香港的第一間丼飯店，中島這名字或者你有點點印像，但又嗡唔出舖頭喺邊。唔使擔心，你腦筋無問題，只不過這個品牌真係既熟悉又陌生嘅，我敢寫包單，10 個香港人 9 個吃過佢嘅出品，無食過嗰個應該 10 幾年前移咗民，中島水產其實就是供應 Aeon、Sogo 超市及其他日式超巿壽司刺身櫃嘅公司。認真，Aeon 的刺身壽司的確唔差喎，即刻打咗枝強心針，有信心嚟試下呢間丼飯。
中島水產後盾強勁，由台北 Sogo 等，到香港有 20 家分店，規模勁大，有把炮從東京日日運來新鮮的吞拿魚做壽司刺身，入貨可能比高檔日本料理更密，吞拿魚日日在食堂旁的康怡 Aeon 超巿工場新鮮劏，連帶挪威來的三文魚，兩樣都是皇牌。
供應中拖羅、赤身及吞拿魚蓉 3 個部分，三文魚只用最肥美的魚腩位置，其餘靚料仲有阿根廷甜蝦、加拿大海膽、北海道帶子等，連米都不錯，用的是新潟越息吹米，係高檔越光米培植出來的品種，甚有 Q 感，材料不俗屬中檔次，如果唔叫最頂級嘅金槍魚丼，平食都係 $69-$99 元咋，無加一，一張紅衫魚有找。
三文魚丼 $69
最平是這款丼飯，三文魚紋理分明，顏色明亮唔暗啞，它來自挪威，銷情最好是這款。
三色丼 $119
包括阿根廷赤蝦、加拿大海膽及三文魚子，赤蝦頗具睇頭，長度大約 4、5 吋，厚肉，海膽分量也有成 40g，記者覺得這丼性價比最高。
免治金槍魚丼 $149
想吃吞拿魚又想實惠點，可吃這個，用劏魚時留下的吞拿魚碎做蓉，另有 4 塊約 15g 的中拖羅及赤身。
特選金槍魚丼 $169
每片金槍魚約有 15g，魚由東京空運來，質素頗為穩定，這款用中拖羅及赤身位置。
舖內有刺身櫃，刺身有柯打才由師傅即叫即切。
舖頭搞到好似壽司吧般，其刺身丼魅力真係沒法擋，這食堂開業第一日，任何時段都被坐滿，有的甚至要把丼飯拿到去 food court 用餐區裏吃，全場最好生意係佢。
Nakayo Shokudou
地址：太古康山道 1-2 號康怡廣場南座 AEON 地下
電話：2535 4100
營業時間：10am-11pm（last order 9:30pm）
收費：現金及信用卡，不設加一
交通：港鐵太古站 A2 出口，步行 3 分鐘
泊車康怡廣場 $30 hr
平均消費：$100
備註：刺身丼附送味噌湯
文：Sieg
(原文摘自 U Magazine ISSUE 558)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
