粥店負責人蔡先生 2 年前接手粥店，由於之前擁有做日本菜的經驗，便想到將過往的日食烹調技巧放到粥品上。粥底熬上幾小時，蔡生特別從日本拉麵中攞靈感去調校。店內除了平常一貫食到的雞粥菜乾豬骨粥皮蛋粥艇仔粥………亦有將日式元素 x 粥的生滾蜆粥及毛蟹粥，兩款海鮮都是經相熟店舖入手，質素相當唔錯。特別推介這裏的蜆粥，粥底夠綿，蜆味夠鮮，加上海藻同煮，味道有幾分似清酒煮蜆，沒半點違和感之餘出奇地配搭。
粥品類雖然已有多種選擇，好玩之處是食客還可自由配搭材料，即係你可以蜆配雞、雞配魚、艇仔配滑牛………只要唔太過分都可以隨個人喜愛一齊滾，夠晒 free。作為與粥最佳配搭的腸粉，這裏的腸粉全是布拉，即叫即製，腸粉厚薄度剛好且晶瑩通透，入口勁滑有米味，必食！
店子真正 3 點不露，問蔡生點解下午 3 點先開門？「呢度夜晚人流先多，加上粥及腸粉都需時預備，所以下午 5 點先開始賣。」3 點前只係賣其他小食，想幫襯記得睇時間。
生滾蜆粥 $40
粥底夠綿蜆亦夠鮮，加上海藻同煮，味道頗似日本的清酒煮蜆，沒半點違和感之餘出奇地配搭。
齋腸 $13
同樣即叫即製，加上麻醬、豉油、甜醬及大量芝麻，齋腸都變成主菜。
咖喱雜錦 $45
同場亦有港式小食，有魚蛋豬皮牛柏葉魷魚等，咖喱用超過 10 種調味煮成，味濃且後勁強勢，嗜辣必試。
韭菜餅 $16/ 6 件
韭菜豬肉餡，每日自家包製，外層煎到金黃色好香口，值得一讚是 size 剛好一啖一個，免除邊食邊跌韭菜的煩惱。
大蝦拉腸 $26
雖然用上雪藏蝦，但經改良後丁點雪藏味都沒有，非常彈牙，完全唔似雪藏貨。
排骨飯 $23
排骨醃得好入味，蒸的時間亦啱啱好，肉質唔會過老，店內蒸飯人氣之選。
光記粥品腸粉美食店
地址：屯門青翠徑 7 號金邦大廈地下
電話：2618 9603
營業時間：星期一至六 3pm-12:30am，星期日休息
文：Froggie、攝：suki
(原文摘自 U Magazine ISSUE 558)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
