有幾個 90 後，就擔心香港人唔夠休閒時間，膽粗粗在在觀塘工廈開了間吊床小休站「Chillazy 躺室」，賣嘅係瞓覺空間，當旁人笑佢哋太瘋癲嘅時候，居然殺出新血路，生多間喺舊屋邨冬菇亭嘅型格甜品。
觀塘吊床空間「躺室」以 chill + lazy 命名，名符其實「賣懶」，出租吊床畀人偷懶瞓靚覺，偏偏有人誤會咗只供應零食汽水的「躺室」係 cafe，使得店主阿熹同阿琛有加盟飲食界嘅念頭。舖頭開在南山邨冬菇亭，左邊賣嗱喳麵，右邊是牛腩麵檔，400 呎型格黑嘅舖頭仔夾喺中間，搞到街坊都不禁好奇眼望望。
這店本屬於阿熹的世叔伯，早前失火，都是阿希阿琛夠大膽，未諗到做乜就決定接手幫世伯將舖頭轉型。兩個男孩都信賣懶有作為，所以賣乜都好，都要唔好趕、唔好急，畀客人慢慢歎，符合這幾項條件，仲唔係賣甜品？鎚已扑，一致決定賣甜品。
全店以黑色灰色為主，仲幫冬菇亭裝埋冷氣，加埋四正日系 cafe 枱同天花吊床，熱屎辣辣嘅地踎冬菇亭變做人間天堂；門外仲有小花園，放咗張吊椅，唔係見到對面係殘舊嘅大坑西邨，仲以為自己去咗大坑。
呢度賣 chill & lazy，所以兩位老闆唔壓榨員工，餐牌唔賣大堆頭，反而賣創意與全新，二人捉埋潮男大廚阿康一齊度橋，souffle x tart、陳皮用嚟做 creme burlee 兼跟配中國茶，仲有加新鮮香草嘅「南山邨 version」刨冰，創意大爆炸，試食過味道仲好搭調添，開咗個多星期，已經好多 fans 嚟 Hea。咁情況，睇下以後邊個仲敢話冬菇亭應該淘汰？
法式陳皮焦糖燉蛋 $34
Creme burlee 裏加了陳皮，估唔到陳皮的甘香同焦糖味都幾夾。還會配上一小杯中國茶。
鐵觀音奶凍配焦糖脆脆 $32
炮製奶凍的奶浸過茶葉，奶凍吃來幼滑香甜，帶淡淡茶味。奶凍另有茉莉及烏龍茶 2 款口味。
玫瑰杞子雪耳露 $32
這碗雪耳露跟足加足雪耳及紅棗，清甜清潤，細心位還有加了玫瑰。
橙酒雪山朱古力 $34
朱古力加上發打的蛋白再燒焦，上半 part 像甜品、下半 part 則飲得落肚。
覆盤子梳乎厘 oreo 撻 $56
這裏的大廚自創，將撻同梳乎厘兩個概念結合，底部是以 oreo 碎做的撻底，中間又有一層 rasberry 做的醬，面層則是梳乎厘，焗好上枱，蛋香味十足，撻面仲撒了些玫瑰花瓣，梳乎厘約 5-6 吋直徑，堅揪吸引。
即烤荷蘭班戟配雜莓楓糖燕麥 $68
超級多料的荷蘭班戟，以原個鐵鑊上枱，上面的藍莓、士多啤梨及自家製的楓糖燕麥多到把班戟都遮蓋了，但禁不住上枱的雞蛋香。
百里香桃冰 $44
個碗大過傳統雲吞麵碗，刨冰上的醬汁不是現成糖漿，而是用新鮮的香桃攪拌而成，最特別是用上百里香葉來吊味，吃來加倍清新。配鮮橙肉及荔枝味雪糕糍。
Chillazy Dessert 糖室
地址：石硤尾南山邨商場平台熟食亭 C4 號
電話：9783 3290
營業時間：星期日至四 3pm-12mn，星期五、六及公眾假期前夕 3pm-1am
收費：只收現金，不設加一
交通：港鐵石硤尾站 B2 出口，步行 3 分鐘
泊車：南山邨停車場 $20 hr
平均消費：$35-$45
相關報導：
不是文青 唐樓花廳
爆粗地正 鬼佬涼茶舖
上環唐樓 不時不吃小餐室
MK 不再 嘴刁實驗室
海邊咖啡即興 PICNIC
BAND 炮製 分裂地窖型店
想睇更多？即上 甜品 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
