周圍的布置當然全部係 B.Duck 黃色的影蹤，門口有大大隻着住廚師衫嘅鴨仔之外，牆身、枱面、枱墊都是 B.Duck，每張枱仲放咗隻鴨仔陪你食飯，就連 staff 的制服都重新設計，成間餐廳幾乎每個位都是影相位，粉絲們一定開心到震！
食物設計都好有心思，絕對不是插塊公仔牌咁無誠意！餐廳用香料飯搓成 B.Duck 跳入咖喱海暢遊，好「duck」意。「白汁海鮮飯」的 B.Duck 更加是 3D 立體，啱晒要「相機食先」的你放上 FB 呃 like！「豚肉丼」用咗溫泉蛋扮鴨仔 pat pat，望落去就好似 B.Duck 倒頭衝入豚肉飯，好盞鬼！咖喱飯或烏冬之外，亦有忌廉蛋包飯、mini 漢堡、沙律、雞翼畀你揀，全部都有鴨嘜頭。食任何一款主餐加 $20 就可以換一套特別版 B.Duck 塑膠餐具，加 $48 仲可以換走 B.Duck 茶杯。餐廳外面又有小型 Pop-up 精品店，大賣書包、餐具、公仔等。4 月 16 日開始，mira mall 分店亦會化身 B Duck cafe，屆時，港九粉絲就唔使入屯門都可朝聖！
吉列豬扒配太陽蛋咖喱飯（配蘋果汁/橙汁/ 汽水） $129
用飯搓成 B.Duck 打橫瞓入咖喱中，用太陽蛋扮太陽，賣相超萌。經過塑型的飯不會被壓爛變得糊口，睇得又食得。
白汁海鮮飯（配蘋果汁/橙汁/汽水）$119
白汁入面有帶子及蝦等海鮮，不過重點是呢隻 B.Duck 係立體㗎，咁可愛點捨得整散隻鴨仔呢？
豚肉丼 $89
倒頭直插豚肉飯中，用溫泉蛋做 pat pat，完全附合 B.Duck 貪玩嘅性格。
B. Duck Cafe by Izumi Curry
地址：屯門鄉事會路 83 號 V City 商場 1 樓 9 號舖
電話：2392 6222
營業時間︰11:30am-10pm
(原文摘自 U Magazine ISSUE 542)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
