Food court 裏大人氣嘅一檔，是「八座小食」老闆達哥係正正宗宗嘅牛下小販第二代，以呢個身份出手賣招牌牛雜，Hong Kong oldish 不能不數這檔。
八座小食吒鎮店美食當然係名震整個下邨的風味牛雜，隨着下邨清拆，達哥爸爸沒有留着那個滷水膽，於是達哥一有重開牛雜檔的念頭，就跟爸爸學煮滷水。達爸人萬能叔叔，皆因當年牛下不少小食檔都靠他賜教，今次他教的是自己親生仔，秘方當然一點不漏傳授與達哥。滷水靠時間浸淫，所以開舖前一個月，達哥已回尚未裝修好的舖頭煮滷水，以求養出鮮味。
達哥說：「我哋啲滷水無秘方，都是陳皮、丁香、草果、桂皮、葱白、醬油等，不過真係落足 28 種材料，唔學坊間啲牛雜舖咁走捷徑用預製的醬料減少工驟。」配方分量當然來自達爸，開舖前由他做技術指導同 QC，煲出的是 90 年代木頭車年代嘅港式滷水牛雜味道。連下內臟的次序都不能亂來，先下無色的腸臟、蘿蔔，接着是色水稍深的牛心、牛肚、牛肺，最後才下滷會散出纖維的牛膀，保持整煲牛雜色水漂亮：五香味突出，鮮味而不過濃過鹹、也不會因南乳下得來而變得橙紅，保持滷水嘅淡灰色澤，街坊個個話搵得返牛下風味。
五香牛雜 $12 串
牛沙瓜、脆骨、草肚、牛膀、蘿蔔、粉腸、牛腩、牛心、牛膀
牛雜係下欄，八座小食卻有本事叫它們變成上菜，其實靠洗得乾淨，牛肺、牛心、牛肚、大腸、粉腸、蘿蔔、脆骨、牛膀，甚至有牛雜檔罕見的牛第四個胃「牛沙瓜」，腥味臭味比冷藏貨大減一截，而且朝朝開舖前才處理，汆水洗白白 45 分鐘以上等它們乾乾淨淨，就算係超級污糟嘅「大腸」，裏裏外外洗得乾淨，無便溺餲味，一食入魂。最腥嘅牛肺牛心，零內臟腥味，下欄當上菜做。
達哥還是覺得爸爸老拍檔才信得過，特別請了當年負責開檔的肥姐回來座鎮，肥姐對街坊嚟講，辨識度超高，更重要是她完全知道「萬能叔叔」嘅配方、煮法和煮滷水火喉，有她跟自己拍檔，保証煮返牛下風味出嚟。
牛雜以外，臭豆腐及沙嗲陳皮魚蛋 2 款走鬼檔招牌作為返埋嚟。臭豆腐仲搵得返當年嘅供貨商，自家發酵自己炸；後者用真·香料剷出沙嗲，加埋彈牙煙韌嘅「細細粒」陳皮魚蛋，兩種美食都係跟足老竇配方製作，口味夠懷舊，所以唔理係咪牛下街坊都專登嚟舊夢重溫，大人氣咪咁樣儲返嚟囉。
五香牛雜 $20 細碗、$30 大碗
牛雜不下味精、也不會大量加鹽，滷水鮮香有五香味道，不會如外間般死鹹、南乳下得剛好，食落無乜內臟腥味，滷水香味逼晒入牛雜度。其中牛膀、草腸、粉腸及肺都超正，間中仲有牛雜檔少有嘅「牛沙瓜」（即牛第四個胃）。
臭豆腐 $10 件
聞落「臭」，食落味道到位，唔會有刺鼻的臭味苦咊，食返小時候味道。
八座沙嗲魚蛋 $7 串
70、80 後口中嘅「細細粒」魚蛋，其實是陳皮魚蛋，達哥找了很久才搵到供應商，找回以前陳皮魚蛋的質素，魚蛋超實淨超彈牙，原味吃真係有陳皮香，魚肉味也濃郁。沙嗲掛到汁，有少少甜味，但香辛味足，辣勁十足。
八座小食
地址：九龍灣牛頭角道 3 號 TBG Mall 得寶商場牛下新城–得米美食檔
電話：從缺
營業時間：11am - 11pm
收費：只收現金，不設加一
交通：港鐡九龍灣站 B 出口，步行 5 分鐘
泊車：淘大商場 $22 hr
平均消費：$10
歡迎你 like 我哋 U Food Facebook Page / U Food Instagram ，取得我哋更新更快嘅資訊！
