好欣賞日籍 designer 的創意，紅磚牆掛上愛恩斯坦、差利卓別靈、柯德莉夏萍拿著串燒的 pop art，室內設計結合復古、型格、玩味於一身。地方亦算闊落，對於一個下班後拖著疲累身驅的人來說，有空間感又坐得舒服，真係好重要！
星期五、六店子開得夜，來宵夜就啱晒。我每次都會食博多串燒，出身於名店田舍家的日籍大廚下地敦，控制火候準繩，日本德島阿波美雞、A4 鹿兒島和牛、鹿兒島黑豚，俱燒得香口，肉嫩富肉汁。每款串燒附上日本椰菜，爽口解膩。其他博多一品料理，燒明太子、燒一口餃子、牛蒡天婦羅烏冬，亦都好啱佐酒！
最近，師傅仲有好推介，就係時令日本生蠔，果然隻隻新鮮肥美，蠔味又重，勁吸引！4 款生蠔分別來自岩手縣的赤崎、宮城縣的唐桑、北海道的昆布森及厚岸，提供 4 種不同食法讓客人自選。刺身可揀配岩鹽和檸檬汁，又或配番茄辣汁 shooter；熟食則可揀配柚子味噌燒，又或蒸蠔配柚子醬油。生蠔逢星期一至六返貨，晚市前送抵店中，即叫即開，隻隻帶海水味。難怪每晚賣出 80-100 隻，專人開蠔開到手軟！
飲杯用青蘋果、菠蘿、芥辣、爆炸糖溝出來的清酒 Liqueur，仲過癮呀！
岩手縣赤崎生蠔 shooter 配番茄辣汁 $68/ 隻
赤崎生蠔邊位爽脆，富海水味，滲微微銅味，最夾帶辣勁的茄汁，開一開胃！
北海道昆布森生蠔刺身配岩鹽及檸檬 $62/ 隻
生食昆布森生蠔，最能感受到原始 creamy 滑嘟嘟的特質。灑點粉紅岩鹽，更帶出鮮味。
燒北海道厚岸生蠔配柚子味噌 $62/ 隻
厚岸生蠔大隻厚身，燒後不會勁縮水。質感 creamy，最襯微鹹酸的柚子味噌！
蒸宮城縣唐桑生蠔配柚子醬油 $68/ 隻
宮城蠔爽甜，海水味重，帶微金屬味，肉質豐富，與清新微酸的柚子汁好match！
北海道海膽卷 $128
呢個花形卷明冧少女，北海道根室海膽軟綿 creamy，極襯清爽的日本青瓜。
和牛壽喜燒串（跟蛋黃）$55
和牛片索盡 sukiyaki 汁，又甜又 juicy，捲著日本水菜、金菇和丁字麩，蘸日本蛋黃，蛋香濃，爽滑並重。
胡椒鹽免治雞肉棒 $32
自製雞肉棒軟滑中不失口感，滲胡椒辛香。
牛舌串 $38
厚切牛舌，更添爽脆咬感。
明太子黑豚腩卷串 $28
明太子甘香微辣，豬腩肉富油香。
Yayakiya
地址：尖沙咀漆咸道南 29-31 號溫莎大廈地下
電話：2723 9833
營業時間：星期一至四 12nn-2:30pm，6pm-12mn；星期五 12nn-2:30pm，6pm-2:30am；星期六 6pm-2:30am；星期日 6pm-12mn
收費：現金及信用卡，設加一
交通：港鐵尖沙咀站 P3 出口
泊車：加拿芬廣場 $31/hr
平均消費：$250
相關報導：
半世紀心血，潮洲打冷。
重慶紙包魚，滑過烤全魚
好大鑊！韓系火燒芝士雞
歡迎你 like 我哋 U Food Facebook Page / U Food Instagram ，取得我哋更新更快嘅資訊！
