每日 9 時前，這裡的確是吃大路韓燒店都可吃的的烤豬腩肉豬皮泡菜海鮮湯等大路韓食，不過一到 9 點後，就會變身「串燒店」。
事緣兩個香港人老闆 Wilson 同 Eddy 見香港實在有太多韓燒店，決定搞搞新意思，既然唔少香港人都鍾意 happy hour，飲酒傾偈食香口嘢，搞串燒放題就啱晒！頭 50 個客人可以 $138 任食近廿款串燒個半鐘，酒水仲半價，非常抵食，難怪 9 pm 未到就初現人龍；至於第 51 位或以後的客人都唔怕，同樣可以 $23 / 串的價錢享用串燒，同 friend 以韓串吹水。
串燒種類非常 free style：韓系的有豬皮、牛肩肉、五花腩、豬腸，日系的有帆立貝、雞皮，港式的有虎蝦同菠蘿豬頸肉，大部分都不經調味，畀客人自行選擇灑鹽或點韓式辣醬和蒜蓉豉油等。食落其實同一般串燒店食到的分別不大，只是客人喜歡自己落手整串燒，變相有得任食又有得玩。老闆的諗頭還不止於將韓燒變成 DIY 串燒，他還打算由 12 月起舉辦免費快閃式泡菜班，由韓籍師傅即席拉現場客人齊齊學整，整完仲可拎製成品返屋企！
虎蝦
東南亞貨色，隻隻手掌大，鮮甜彈牙，回本之選。
豬腸
先用香料及韓式醬油煮熟再燒，入味之餘又夠爆膏，油香滿瀉。
雞肉串
雞肉輕輕用海鹽醃過，與燈籠椒、京蔥、蒜頭等同燒，夠香口。
牛肉露筍
美國牛肩肉脂香豐富，肉質軟腍，輕輕灑點海鹽已非常好吃。
帆立貝
帆立貝非常大粒，裙邊香口，中間部分甜美。
豬皮
這樣燒韓式豬皮便不會周圍彈，好方便，食落爽中又帶重膠質，骨膠原好豐富。
豬腩肉
比利時五花腩厚切，燒香吃肉腍 juicy，不帶豬燥味。
除了宵夜時段，9pm 前來有以下推介：
燒汁魷魚 $98
用的是香港仔運來的新鮮貨，鮮甜無渣，店子可細心將魷魚起花，易熟之餘燒起來又更靚。
一呎長牛肋骨 $288
美國入口的牛肋骨在店內由師傅片成足一呎長的薄片，好有氣勢，食時可逐少剪出來燒，燒香吃肉味香濃。
厚切黑毛豬肉眼扒 $148
用的是西班牙的黑毛豬，豬味濃，油香十足，厚切口感非常好。
韓式芝士海虎蝦 $298
呢度都可見到芝士鐵板菜式，芝士旁放滿炸雞翼和燒虎蝦，連炸豆腐、西蘭花同炒蛋都在其中，全都可以 dip 芝士食，真係創意無限。
Mok Ja Korean BBQ
地址：灣仔灣仔道 230 號佳誠大廈地舖
電話：3188 6628
營業時間：星期一至五 12nn-3pm、6pm-11pm，星期六及日 6pm-11pm
收費：現金及信用卡，晚市設加一
交通：港鐵灣仔站 A3 出口
泊車：集成中心 $30/hr
平均消費：午市$70、晚市$250
備註：每晚 9pm 後首 50 位客人可以 $138 (另設加一) 任食串燒 1.5 小時，其他客人則可以每串 $23 享用。
相關報導：
巴閉過江龍 專利鐵板黑豚
想睇更多？即上 灣仔 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
