最近尖沙咀有家正宗博多串燒屋登場，主打博多風串燒，有別於東京 style 以雞肉和大葱作主打，博多串燒則以豬肉為主，通常用豬腩肉捲住配料一齊燒，中間更會串住洋葱，食落更香甜惹味。最特別是串燒下墊住椰菜，以小盒子盛載，賣相靚之餘，椰菜可吸走餘油份，食落不油膩。
主理串燒的日籍總廚 Shinji Tomori，曾任田舍家大廚，堅持用正宗方法炮製串燒。像九州黑豚豬，脂香油香十足，邊塗秘製醬汁邊用炭火燒，風味一流。配豬的材料有十多種，像鵪鶉蛋、青椒仔、芝士紫蘇、露筍等，超豐富。嗜牛的都有得揀，像和牛壽喜燒，用澳州 M7 和牛，捲住麵筋、水菜和金菇燒香，吃時蘸蛋黃漿，又濃香又滑溜。
除了串燒，這裏也有一品料理供應，最特別是威化壽司，威化盒子內釀了魚生、日本米和冬菇蓉，外層脆卜卜，內裏超鮮味。別以為串燒吧只有 sake 和啤酒，這裏亦有不少日式雞尾酒，推介 Apple Sabi，以 sake、檸檬汁、wasabi、蘋果甜酒等調成，先嘗到酸甜味，後帶芥辣辛香，貪現的仲可多加 wasabi 和爆炸糖一齊飲，好刺激。
至於裝潢，走摩登路綫，滿室紅磚牆，以金屬燈罩點綴，富有工業味，設計風格比日本地道串燒屋有睇頭。店子開至凌晨一兩點，以後宵夜又有好去處。
特別推介：
雜錦卷物串燒 $26-$33/ 串
用豬腩肉捲住食材來燒，是博多串燒的正宗做法，像鵪鶉蛋豬腩肉卷（$28）、迷你青椒卷串（$28）、芝士紫蘇葉卷串（$33）等。墊底的椰菜，加了米醋和鰹魚汁，清新解膩。
西班牙黑豚豬卷串 $48
九州黑豚豬口感結實，西班牙黑豚肉則較軟腍，肉味也較濃，食時配少許黑松露鹽，更能提升香味。
和牛壽喜燒串 $55
澳洲 M7 和牛內捲住麵根、水芋、金菇，入口充滿脂香，食時蘸點蛋黃漿，口感更加香滑。
海膽威化壽司 $45
從日本訂購的威化盒子，裏面夾滿海膽、冬菇蓉和飯粒，食落鮮味澎湃。
岩蝦天婦羅 $72
泰國岩蝦切粒後炸香，肉質爽滑彈牙，加上少許日本咖喱鹽、辣椒絲，食落帶少少辛辣，佐酒一流。
紅酒煮雞肝 $58
以蒜頭、紅酒和百里香浸醃，再連汁慢煮兩小時，紅酒香完全滲入雞肝，食時配上法國芥辣籽，更加惹味。
Apple Sabi $128/ 壺、$88/ 杯
附上 wasabi、爆炸糖，讓客人加入酒內，舌頭感受到陣陣辛辣和彈破，超級刺激。
Yayakiya
地址：尖沙咀漆咸道 29-31 號溫莎大廈地下 10-12B 號舖
電話： 2723 9833
營業時間：星期日至三 12nn-2:30pm、5:30pm-1am，星期四至星期六 12nn-2:30pm、5:30pm-2am
收費：現金及信用卡，設加一
交通：港鐵尖東站 P3 出口
泊車：鐵路大廈停車場 $25/hr
平均消費：$250
想睇更多？即上 新餐廳 / 尖沙咀 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
