近日又有幾家主打懷舊美食的餐廳登場，老闆都是愛吃之人，落了很多工夫和心機重現昔日風味，同時將食材和做法升級，加上玩味的裝潢，將舊日小食變成新潮流。
升級版懷舊冰室
尖沙咀新開才一個月的「巴黎冰室」，一望就知裝潢經細心打造，黑白格仔地磚、舊海報，水吧頂掛著舊式時鐘，連卡座的椅背也刻意做得較矮身，讓客人可以把手臂擱着，重現舊日屋邨冰室街坊邊食邊打牙骹的景象。
老闆葉生本身從事貿易，細個返學前都去屋企樓下間冰室食碗沙嗲牛麵，對冰室特別有感情，出來工作後依舊經常蒲冰室，卻發現從前的味道難尋。「依家好多茶餐廳出品都好馬虎，我覺得平民食物都可以做得用心㗎，而且好想搵番舊時屋邨的人情味，就試下自己開一間。」他說。
落足心機用靚料
食物全部落足心機製，像炸雞髀，真正即叫即生炸，不像一般的預先炸定，雞皮位用刀一切，即傳來「咔咔」聲，聽見都知超脆，食落內裏 juicy 嫩滑，而且先醃過夜，夠晒入味，沒有一陣雪藏味；沙嗲牛肉包，牛肉份量一點也不吝嗇，大大片鋪滿整個包，而且是新鮮牛肉，柔軟而不失咬口，吃得出沒加鬆肉粉，最正是沙嗲汁，配方是老闆以前跟老式冰室請教得來的，微辣、充滿花生香，香濃惹味，配烘過的甜麵包，超好吃！
其他食材也升級，紅豆冰的紅豆用台灣貨自家煲成，比天津紅豆更大粒，軟腍得來又保留了粒粒咬口；跟餐的餐包棄用一般白方包，改為價錢貴 4 倍的丹麥酥，烘得脆口，入口啖啖牛油香；炒蛋用較濃蛋味的湖北蛋，而且不加奶，吃到的都是純蛋香，百分百舊日的好滋味。這裏也有自創的粟米芝士撈薯仔麵、魚子醬溫泉蛋多士等供應，增添新鮮感。
特別推介：
炸雞髀配薯條 $36 （下午茶餐，飲品轉紅豆冰加 $18）
即叫即炸，外皮脆卜卜，肉質嫩滑多汁，配以粗薯條，加多杯用台灣紅豆煮製的紅豆冰，紅豆份量超多又不過甜，滿分！
西多士 $29
多士有成 2 吋厚，炸得金黃色，中間塗滿粗粒花生醬，加上鮮牛油及糖漿，香甜得來又吃到蛋香，好邪惡卻忍不住吃了一口又一口。
粟米芝士撈薯仔麵 $56 （特餐連飲品，12nn 後供應）
冰室版 Carbonara，用瑞士藍芝士加忌廉煮成汁撈韓國薯仔麵，連溫泉蛋吃，口感煙韌彈牙，芝士香濃中帶煙肉的鹹香，又有粟米粒減低膩感。
沙嗲牛肉包 $33
牛肉份量多又鮮美，沙嗲汁超香濃，帶陣陣花生香，配甜甜地的甜 bun 好夾。
魚子醬溫泉蛋多士 $89
以丹麥酥烘成多士，沾上溫泉蛋的蛋汁及魚子醬來吃，很好吃，配高級餐廳才用的意大利黑醋欖油沙律，清新開胃。
巴黎冰室
地址：尖沙咀寶勒巷 27 號地舖
電話：2316 2015
營業時間：7am-11pm
收費：只收現金，不設加一
交通：港鐵尖沙咀站 A2 出口
泊車：鐵路大廈 $25/hr
平均消費：$60
飲食熱話
↓【限時搶⚡】moonwell尊貴花膠食療系列養生燉湯↓
↓正宗原條花膠筒｜滋陰養顏↓
Buffet 導「嚐」員招募計畫 🍴✨
↓ 召集Foodies！Buffet 導「嚐」員招募計畫🍴正式開始啦！↓
