要數頭號熱爆芝士韓菜，就係芝士排骨！熱潮係由舊年年中形成，首爾、弘大、新村及明洞等都有好多專門店，醃味配料煮法，雖然家家不同，但食法大致相近；將煮好的排骨跟芝士和配菜，放在長形鐵板上，連 Gas 爐上桌，等到芝士融掉，就可以將排骨捲起芝士趁熱食，是為最正！
點解芝士同排骨係絕配？聽當地人講，因為排骨味道辣辣哋，正好跟軟綿綿、較淡味的芝士來個平衡。排骨以外，更有芝士雞肉、芝士雞腳、芝士豬腸及芝士八爪魚，口味花款千變萬化。
轉個頭，呢道菜響香港都食到啦！新舊傳統韓國餐廳、燒烤店等都有賣，像 Ssam、平昌韓國料理、達人烤肉及 Oppa Coffee Bar. Restaurant 等，每客售價由二百頭至近三百蚊不等。其中 Ssam 及平昌會以鐵板連 Gas 爐上桌，其他店則以燒熱過的鐵板上桌，總之令芝士熱辣辣，呈半融狀態，咁入口先最滋味！
--------------------------------------------------------------------
這是近期最人氣最長龍最多人爭住食的芝士排骨！它來自金巴利街的 Oppa Coffee Bar. Restaurant，店子開業幾星期，晚晚現人龍，門外閒閒哋有廿幾三十人。咁墟冚，無非為其 say cheese 系列，除了有芝士排骨，還有芝士雞翼、雞腿、雞腳兼八爪魚，選擇比一般韓食店多。每款每晚限量約 50 客，通常 9:30pm 左右已全部 sold out！
當中芝士排骨係店中人氣 no.1，聽韓籍店主 Jim 講，單係準備工夫起碼要 3 日。「醃排骨的醬汁要熬兩日，當中有辣椒醬、雪梨、蒜頭和醬油等，熬完再將排骨醃一日半。韓國人食得好辣，我已將辣度調底，令香港人都接受到。」他說。
排骨以加熱至 300度 的圓形鐵板上桌，一客約有 6、7 件，侍應會趁熱將一杯 Mozzarella cheese 倒在排骨上，還會借助火槍加快把芝士融掉，看到粒粒芝士在鐵板上「跳舞」，兩三分鐘漸漸融化，食得！雞手鴨腳？唔使怕！店中 oppa 會幫忙用鉗和筷子夾起排骨捲芝士，然後讓你動手試！排骨入口軟腍，捲埋芝士，鹹鹹辣辣，芝士軟軟的又煙韌，估唔到咁 match！拉得愈高愈好玩滋味！
芝士排骨
排骨醃味後會炆煮至腍身，有柯打時略燒，增添香氣。趁熱快捲芝士，鹹辣夾雜；特別用 Mozzarella cheese，軟綿綿又夠煙韌，隨時拉到壽麵咁長。
Oppa Coffee Bar Restaurant
地址：尖沙咀金巴利街 1F 地下
電話：2386 2315
營業時間：12:30nn-2:30pm、6:30pm-4am
收費：暫時只收現金，設加一
交通：港鐵尖沙咀站 B1 出口
泊車：金巴利街咪錶位
平均消費：$150
註：如食物售罄會提早關門。
