講真，出名嘅香港名廚唔係有好多個，Harlan Goldstein 肯定係其中一位大師中嘅大師，由佢喺 ifc 間Harlan's 開始，已有「名人御廚」嘅稱號，超超超靚仔嘅黎明、前財政司長唐唐都特登去幫襯，而家喺中環坐擁多間高檔餐廳，其中 Gold By Harlan Goldstein 仲連續兩年得到一粒米芝蓮星星，都真係唔嘢少。
Harlan 呢兩年仲動作多多，之前開咗間 Harlan Goldstein's Comfort，唔做 fine dining，反而賣咖喱牛腩、刈包等 comfort food（煮法當然係米芝蓮級，唔係亂咁嚟），最爆炸性嘅係去年年中仲開埋日本菜，鬼佬踩入東洋陣地，好有趣嘅結合，至於成果係點？我犧牲下，而家為咗大家去刺探軍情，試下佢嘅 tasting menu。
Harlan 無啦啦愛上日本菜，係因為佢舊年玩減肥，因為日本菜又健康又新鮮，就中咗招啦，於是嗱嗱臨開間日本料理，佢喺呢行撈咗咁多年，握壽司工夫可能唔夠日本師傅嚟，但眼界同美食執行力係超凡級數，interview 咗好多個廚師呀，終於搵到日籍總廚前田師傅合作，兩個人度啲創意日本菜出嚟，呢度用最傳統嘅方法做日本料理，但菜式喺設計上好有創意，好似壽司咁就混咗啲法國菜同其他西菜風格，三文魚 x 番茄柚子、赤身 x 松露油，但米又指定用返刁鑽的北海道 Nanatsuboshi 米，保留返東洋握壽屋嘅堅持，而家連日本都興呢種風格。
第一次嚟呢度，最好好似我咁試佢哋嘅 tasting menu，六道菜入面，傳統和搞鬼新派嘅日本菜都有，傳統有鰤魚同蟹肉里芋煮，前者好滑煎得好香，後者的里芋係時令，澱粉質好高，加埋新鮮蟹肉推成羮，有芋味又有蟹鮮甜。反傳統嘅就有我正話提過嘅「手握壽司三款」。
食呢個套餐，仲可以加錢試下 3 款特別為呢個套餐設計的 sake pairing，有適合配刺身的「賀茂泉 青泉生酒 純米吟釀」、宜配和食的「富士高砂 山廢 純米吟釀」及配創意壽司的「山花 純米大吟釀」，加 $198 就可以試齊。差啲掛住食唔記得講，呢度仲可以「食景」，餐廳位處夠高可以睇到銅鑼灣的海景㗎。
Sushi To by Harlan Goldstein
地址：銅鑼灣登龍街 1-29 號金朝陽中心二期 29 樓
電話：2970-3218
營業時間：星期日至四 12nn - 3pm、6pm - 10:30pm，星期五、六 12nn - 3pm、6pm - 11pm
