今早自從多啦A夢（即係我哋較為熟悉嘅叮噹）配音員林保全突然去世嘅消息一出街，Facebook 馬上大洗版，全部都係RIP，以及有關於叮噹以及林保全嘅報道。唉，點都好啦，死者已矣，我哋惟有不斷翻睇叮噹嘅片段，懷念吓叮噹嘅笑位，以及叮噹「生前」最鍾意食嘅小吃 - 豆沙包啦！
有關叮噹有幾鍾意食豆沙包，其實喺好多集入面都有提到。例如叮噹試過為咗想買豆沙包而賣乾橙賺錢。大雄喺度勸叮噹嘅時候，仲出現咗一堆關於豆沙包嘅菜式，例如豆沙包Sashimi、豆沙包扒、豆沙包漢堡、豆沙包飯等等。叮噹亦曾經因為無得食豆沙包，用自家法寶集塵機整咗一個豆沙包！！
其實叮噹最愛嘅豆沙包，喺日本叫做 Dorayaki 銅鑼燒，銅鑼燒可以算係日式鬆餅/pancake，用兩片圓形狀、類似蜂蜜蛋糕質地嘅蛋糕皮包住淡淡甜味嘅豆沙餡。佢嘅特點係有好強嘅蛋香味以及淡淡嘅蜜香味。雖然內裡嘅餡料可以轉換，但最受大眾歡迎嘅當然就係叮噹至愛嘅紅豆餡啦！
想食個豆沙包，懷緬一下？Saint Etoile Bakery、 La Bohéme Bakery、山崎麵包部分店舖均有發售！想自己學整豆沙包？No problem，即刻為你送上食譜！
叮噹豆沙包
材料：
蛋 3個
糖 7湯匙
牛奶 5湯匙
蜂蜜 2湯匙
麵粉 180克
泡打粉1茶匙
紅豆沙400克
步驟：
(1) 將全部蛋放到大碗裡打至粗泡，然後分3次加糖，打至發白且完全打發，打發後加入牛奶和蜂蜜再攬拌，每次逐少添加。
(2) 將麵粉、泡打粉混合過篩後分幾次篩到蛋糊中，快速拌勻，蓋一張煮食紙後等半小時。
(3) 將平底鍋燒熱，倒入大概 3 湯匙的麵糊，以中小火慢煎7-8分鐘，煎至表面很多氣泡出現邊邊翹起，就可用鏟子順利將餅翻轉，再稍為略煎一下。
(4) 煎好的餅皮應該一面是咖啡色，一面是米黃色的。餅皮放涼後取兩個大小相當的，在米黃色那面抹上紅豆沙，對齊蓋好即成。
